Aytən kimi jurnalistlər çox olsaydı, o cinayət baş verməzdi - Elçin Şıxlı

Bunu Bakupost.az -a açıqlamasında Azərbaycan Jurnalistlər Birliyinin sədri Elçin Şıxlı jurnalist Aytən Məmmədovaya hücum edilməsi məsələsindən danışarkən deyib.

“A. Məmmədova kimi öz işini bilən, peşəkar, peşəsinə dönük çıxmayan jurnalistlər tək-tükdür. Onun çox gözəl qələmi, təfəkkürü və yüksək qabiliyyəti var. A. Məmmədova ümumən məhkəmə işlərilə məşğul olan jurnalistdir. O, məhkəmədə olan, dindirilənlərin ifadəsinə istinadən, məntiqə uyğun olaraq araşdırma yazı yazır. Nə özündən fərziyələr yazır, nə də cinayət edir. A. Məmmədova deyilən faktlar, məhkəmə sənədləri əsasında yazılarını yazır. Təbii ki, orada müəyyən dərəcədə öz fikirləri olur ki, bu da normal bir şeydir”.

“Jurnalist peşəsi bütün dünyada təhlükəlidir. Onlar təhlükəsizliyini 100 halda qoruya bilsələr də, 101-ci halda mümkün olmur. Hər cür hadisələr baş verir. Təəssüf ki, Azərbaycanda jurnalistlərə qarşı törədilmiş cinayətlərin çoxunun üstü açılmır. Demək olar ki, heç açılmır.

Açılanda da elə bir cəza verirlər ki, o cəzanı verməsələr, ondan yaxşıdır. Bu nöqteyi-nəzərdən jurnalistlərin təhlükəsizliyi üçün həm hökumət strukturları, həm də cəmiyyət olaraq çalışmalıyıq. Təəssüf ki, o qədər üzdən iraq jurnalist var ki, digər peşəkar jurnalistlərə də münasibət həddindən artıq pisdir. Aytən xanım kimi peşəkar jurnalistlərin sayı çox olsaydı, o cinayəti törədə bilməzdilər. Görürlər ki, hamının ağzı qapanıb, hamını susdurublar, tək-tük səslər çıxır. Ona görə də tək-tük səslərin üstünə gedirlər. Biz jurnalist olaraq elə etməliyik ki, səsimiz güclü olsun və Aytən kimi peşəkar jurnalistlərin üstünə heç bir kəs bıçaqla hücum edə bilməsin”.