Bu payız ayrılıq qoxuyur yenə...

Bakupost.az “Gecə pıçıltıları” rubrikasında Elçin Mirzəbəylinin "Bu payız ayrılıq qoxuyur yenə" şeirini təqdim edir:

Bu payız ayrılıq qoxuyur yenə

Bomboz çiskinində itirəm,

Sağ ol.

Yollar izlərimi oxuyur yenə,

Sən olan şəhərdən gedirəm, sağ ol.

Burda sevdaların nəfəsi soyuq

Burda ölüm doğur açılan səhər.

Sarayı, koması,

qəfəsi soyuq -

Yaşayaq...

birtəhər.

Ölək...

birtəhər.

...Bu payız ayrılıq qoxuyur yenə...

Havası sıxılıb dodaqlarıma.

Buluddan göz yaşı toxuyur yenə -

Götürüb sərəcək yanaqlarıma.

Göz yaşı xalısı, həsrət kilimi

Min rəngə çalacaq baxışlarımda.

İllərin əzabı, dərdi, ələmi

Qol-boyun olacaq naxışlarında...

...Sıxır boğazımı acı kəlmələr

Bu sonsuz qəhərdən gedirəm, sağ ol.

Neyləyim...

Sevmədi məni bu şəhər...

Sən olan şəhərdən gedirəm, sağ ol.