Kəndli malını bazarda özü sata bilmir: inhisarçılıq var, qiymət artır - Deputat

Deputat kəndlilərin müəyyən problemlərinə toxunub:

“Bu gün bazarlarda əksər satış nöqtələri eyni adamlar tərəfindən tutulub. Həmin şəxslər topdansatış ticarət məntəqələrindən, kəndlilərdən məhsulları alır, üstünə də öz əlavəsini qoyaraq satışını həyata keçirir. Yəni kəndlinin istehsal etdiyi məhsul yerində çox ucuz qiymətə alınır, sonra da topdansatış məntəqəsinə daşınaraq artıqlaması ilə bazarlara və marketlərə satılır. Bazarlarda və marketlərdə satışı həyata keçirənlər isə bu sahəni inhisarına alıb. Nəticədə malın son qiyməti ilkin qiymətindən 3-4 dəfə baha olur”.

“Düzdür, bazarlar, marketlər özəl mülkiyyətdədir və bazar sahibi istədiyi adama satış nöqtələrini icarəyə verə bilər, lakin bazarlarda həmişə eyni adamlar olduğundan qiymətlər rəqabətliliyin yaranmasına imkan vermir. Bazar işlədən sahibkarların qarşısında tələb qoyulmalıdır ki, kəndlilər öz məhsullarını birbaşa bazarada satışa çıxara bilsin. Bunun üçün bazarda kənd təsərrüfatı məhsullarını satan şəxslərə malın özü tərəfindən istehsal edildiyi haqqında yerli bələdiyyədən və ya icra nümayəndəsindən arayışın alınması tələbi qoyulmalıdır. Arayışı olmayan mallar isə ümumi bazarlara buraxılmamalıdır. Bu yolla bazarlardakı qiymət inhisarçılığını aradan qaldırmağın mümkün olacağını düşünürəm”.