Ru
16:26 / 23 Dekabr 2021

Təhsili gözdən salmağın gətirdiyi fəlakətlər - Günel Səfərovanın yazısı

7473
Günel Səfərova
Təhsil Nazirliyi yanında İctimai Şuranın sədri

Hər bir dövlətin gələcəyi vətəndaşlarının təhsil səviyyəsindən və dünyagörüşündən asılıdır. Təhsil nəinki bütövlükdə cəmiyyətin, ayrı-ayrılıqda onun hər bir fərdinin həyatının ayrılmaz hissəsidir və bu baxımdan təhsil sahəsində baş verən istənilən dəyişikliyə, yeniliyə, hətta sıradan bir hadisəyə, peşəsindən asılı olmayaraq, istənilən şəxsin reaksiya verməsi, münasibət bildirməsi təbii qəbul olunmalıdır.

Amma bununla yanaşı, təhsilin həm də xüsusi və həssas yanaşma tələb edən bir sahə olduğu, onun ən müxtəlif formada gözdən salınmasına xidmət edən davranışların işığa, inkişafa deyil, qaranlığa xidmət etdiyi unudulmamalıdır.

Təhsilin gözdən salınması cəhalətə, xurafata qucaq açmaq, cəmiyyəti feodalizm dövrünün qaranlığına sürükləməkdir.

Bu gün təhsil sisteminin müasir çağırışlara cavab verməsi istiqamətində yeni addımların atılmasına və təhsilin keyfiyyət göstəricilərinin yaxşılaşdırılmasına ehtiyac vardır. Təhsilin keyfiyyətinin yaxşılaşdırılması üçün təhsili idarəetmə sisteminin təkmilləşdirilməsi zəruridir. Bu gün Azərbaycan təhsilində islahatların davam etdirilməsi və neqativ halların qarşısının alınması üçün subyektiv, fraqmentar yanaşmalar, inzibati amirlik metodlarından istifadəni deyil, hüquqi, normativ tənzimləmələri əsas götürən sistem yaradılması başlıca hədəf olmalıdır.

Proses, uzun illərdən bəri təhsil sistemindəki bütün neqativ amillərdən faydalananların ciddi müqaviməti ilə qarşılaşdığı üçün də kövrəkdir və daha qətiyyətli addımların atılmasını, problemlərin olduğu kimi dilə gətirilməsini tələb edir. İstənilən sahədə şəffaflığın, cavabdehliyin təmin edilməsi üçün ilk növbədə problemlərin özünü “şəffaflaşdırmaq”, hamının görə biləcəyi bir müstəviyə çıxarmaq lazımdır. Təhsil nazirinin bu istiqamətdəki səyləri də, məhz mövcud problemlərin, həm də ictimaiyyətin dəstəyi ilə aradan qaldırılması, mümkün çatışmazlıqların olduğu kimi təqdim olunmasına xidmət etdiyi üçün tənqidlə yanaşı, həm də təqdir olunmalıdır. Nazirin fikirləri doğru oxunmalı, şəffaflıq üçün mexanizmlər tapılmalı, məktəblərə ianə sistemi rəsmi olmalıdır.

Təhsil kimi hər birimiz üçün vacib olan sahə ilə əlaqədar müzakirələrdə populizm, yalançı pafos, demaqogiyanı yox, açıq müzakirələri, məhsuldar fikir mübadiləsini, rasional, həll yolları təklif edən yanaşmaların, modellərin müzakirəsini təqdir etməliyik.

Cəmiyyət olaraq problemlərimiz, təhsilimizin inkişafını əngəlləyən bütün digər məsələlər haqqında açıq danışmağı bacarmalı və həlli prosesində də birlikdə iştirak etməliyik. Çünki təhsilin problemləri cəmiyyətin və onun hər bir fərdinin problemləridir.

Biz məktəb, müəllim və valideyn arasında dialoqun başlamasını müsbət qiymətləndiririk. Təhsil Nazirliyi yanında İctimai Şura olaraq düşünürük ki, bu əlaqələr daha da güclənməlidir.

Eyni zamanda maliyyə şəffaflığının təmin edilməsi, icma əsaslı məktəblər modeli və s məsələlər yeni olsa da, bu bizi çəkindirməməlidir, əsas məqsəd müsbət dəyişikliklərə nail olmaqdır, bu istiqamətdə səylərimizi birləşdirməliliyik, islahatlar üçün əlverişli mühir formalaşmasına nail olmalıyıq, bu zaman ortaya çıxan problemləri isə mərhələ-mərhələ, zamanla həll etmək mümkündür.
Bizi telegram-da izləyin
Bizi facebook-da izləyin
Bizi tiktok-da izləyin
Bizi youtube-da izləyin

Şərhlər
  • Seid Qurbani

    Bu xanıma demək lazımdır ki, təhsili sizin kimi ürəyində bir şey fikirləşib, dilndə bir şey deyənlər gözdən salır. Niyə həmişə olanı deməkdən qorxursunuz, bununla anlamırsınız ki, təhsili daha da gözdən salırsınız!? Nə oldu, bu qədər insannın hamısı səhv anlayır, bir səndən başqa!? Sözün qurtardığı yerdəyik artıq! Cəmiyyətin verəcəyi reaksiya bu xanımın vecinədir ki?

  • Elcin Süleymanov

    Elə birinci abzasdan məlum olur yazıdakı yaltaqlıq,məddahlıq. Təhsil nə gündədir ki? Gözdən yox,əldən də düşüb,0 dan da aşağı səviyyədədir. Adamlarda nə utanmaq qalıb,nə də ki....bir şey yazanda cəmiyyətin verəcəyi reaksiyanı düşünmək lazımdır

Son xəbərlər
Çox oxunanlar
Son xəbərlər