Vaqif Poeziya Günləri başa çatdı - FOTO

Bakupost.az xəbər verir ki, Vaqif Poeziya Günləri tanınmış şair Nigar Həsənzadənin “SÖZ” Ədəbi Birliyinin layihəsi olan “İgidlərin sözü “ ilə başlayıb. Layihənin iştirakçıları 44 günlük Vətən müharibəsində iştirak edən, eləcə də şer yazan qazilərdir. Vətən uğrunda döyüşən yazarlar - Oğuz Alparslan, Miri Abdullayev, Eyvaz Eyyub, Nicat Ağayev, Emin Piri, Tamerlan Əsədov, Kərəm Aydın, Tofiq Əhməd, Həsən Kür, Cavid Haşımov, Səbuhi Qurbanov Polla Hənah Vaqifin məqbərəsi önündə döyüşlərdə və döyüşdən sonra yazdıqları şeirləri səsləndiriblər.

Vaqif Poeziya Günləri çərçivəsində keçirilən kitab sərgisində “SÖZ” Ədəbi Birliyinin Mədəniyyət Nazirliyinin dəstəyi ilə çap olunan “İgidlərin sözü” kitabı da təqdim olunub. Kitabda 2016-ci ilin Aprel döyüşlərində, eləcə də 44 günlük Vətən müharibəsində iştirak edən, şəhid və qazi olan döyüşçülərin şeirləri, esseləri, hekayələri toplanıb. Kitabın redaktoru araşdırmaçı jurnalist Aida Eyvazlı Göytürkdür.