Bakıda “Qara Cümə" biabırçılığı – FOTO

"Qara Cümə" günü Bakıda mağazalarda vəziyyət bir anda dəyişir. Sanki bütün şəhər gizli bir siqnal alıb. Bu siqnalın adı endirimdir. Elə bir endirim ki, bəzilərinin içindəki bütün mədəniyyət düyməsini söndürür.

Bir mağazaya daxil olursan. Paltarlar rəfdə yox. Yerdə. Ayaq altında... Hətta bəzən elə görünür ki, paltarlar alıcıdan çox döyüş meydanının yaralılarıdır və vəziyyətləri ağırdır. Bir cüt şalvar elə bil əsir düşüb. Bir köynək iki nəfərin əlində qalıb. Kiminsə əlinə keçsə, evdə qalib kuboku kimi saxlayacaq.

Bu səhnəni görən adam fikirləşir. Endirim mədəniyyət gətirməli idi, amma bəzi adamların içindəki mədəniyyət o qədər kövrəkdir ki, cəmi otuz faiz endirimlə uçub gedir. Halbuki heç bir paltar bu qədər hörmətsizliyi haqq etmir.



“Qara Cümə” gəlib keçəcək. Endirimlər bitəcək. Amma o paltarlar yenə də kiminsə əynində olacaq. Yaxşı görünmək üçün alınacaqlar. Geyinən adam isə bilsəydi ki, aldığı pencək ötən gün kimin ayağı altında qalıb, yəqin ki, bir az düşünərdi.

Əslində həll yolu çox sadədir. Paltar rəfdə dayanırsa, onu ayaqlamağa gərək yoxdur. Mağazada adam çoxdursa, bu bəhanə səbəbi deyil. Mədəniyyət endirimlə satılmır. O heç vaxt kampaniyada olmur. Neçə faiz olursa olsun, dəyərindən düşmür... (Milli.az)