Builki MİQ imtahanlarının fərqi... - “Maksimum şəffaflığa çalışılır”

Bunu Bakupost.az -a açıqlamasında təhsil eksperti Elçin Süleymanov deyib.

Ekspert ötən gün keçirilən MİQ imtahanlarını belə dəyərləndirib:

"Artıq bir neçə ildir müəllimlər təhsil müəssisəsinə MİQ imtahanı vasitəsilə seçilir. Ötən illərdə MİQ imtahanlarında müxtəlif texniki problemlər yaşanırdı. Bəzən test mərhələsində sistem donurdu, müəllimlər suallardan şikayət edirdi. Lakin bu il imtahan daha müətəşəkkil hazırlandı. Namizədlər daha yaxşı hazırlaşaraq iştirak edirdi. Ən yaxşı müəllimlərin seçilməsidə əslində məktəb və cəmiyyət qazanır. Bəzən MİQ imtahanlarına qarşı çıxanlar da olurdu. Lakin ən yaxşılarının seçilməsinin başqa yolu yoxdur. Burada təkcə test imtahanı deyil, müsahibə mərhələsi də var. Dolayısı ilə həm bilik, həm də bacarıqlar ölçülür. Müsahibə mərhələsində bütün proses qeydiyyata alınır. Maksimum şəffaflığa çalışılır”.

“Yəni, daha savadlı kontingent müəllim olmaq istəyir. Bu yaxınlarda sertifikasiya imtahanında 50%-dən artıq toplayan müəllimlərin maaşının 30%, həmçinin mütəmadi olaraq təhsil müəssisələrində çalışanların maaşlarının artırılması istiqamətində görülən işlər bu sahəni cəlbedici etməyə başlayıb. Həm məktəb direktoru, həm müavini, həm də müəllimlər son illərdə kifayət qədər maaş artımını görürlər. Bu artımla birlikdə, keyfiyyət artımının olması müəllimlərin prosesə cəlb olunması ilə bağlıdır. İstər məktəb direktorlarının, istərsə də müəllimllərin işə qəbul prosesinin imtahanla olması tədrisin keyfiyyətinin artmasına səbəb olur".