Türk dünyasının böyük fikir adamı, ideoloq, istiqlal və hürriyyət mücahidi Əhməd bəy Ağaoğlunun ölümündən 70 il ötür.
Bu münsibətlə Vətəndaş Həmrəyliyi Partiyasının qərargahında "Əhməd bəy Ağaoğlu: Difai Partiyasından Azərbaycan Xalq Cümhuriyyətinə" mövzusunda dəyirmi masa keçirilib. Azərbaycan Xalq Cumhuriyyətinin yaradılmasının 101-ci ildönümü ərəfəsində baş tutan tədbiri giriş sözü ilə xalq şairi Sabir Rüstəmxanlı açıb. Bildirib ki, biz həmişə Əhməd bəy Ağaoğlunu xatırlamayılıyıq: "Əhməd bəyin yazdıqlarını Bakıdan İstanbula qədər düzsək, kağızdan yol düzələr. O, ömrünü qeyri-adi yaşayıb, dayanmadan, durmadan, yorulmadan çalışıb, vətəninə, millətinə xidmət edib”.
Daha sonra millət vəkili Fazil Mustafa, Azərbaycan Xalq Partiyasının sədri Pənah Hüseyn, Azərbaycan Demokrat Partiyasının sədri Sərdar Cəlaloğlu, Azərbaycan Sosialist Partiyasının sədri Elşən Həsənov və başqaları çıxış edərək Əhməd bəy Ağaoğlunun həyat və faliyyətindən danışıblar.
Elşad Barat