02:47 / 22 Noyabr 2021

Məvacibin nə olduğunu bilməyən deputat - Anar Məmmədovun “tövsiyə”sinə sərt reaksiya

7477


Anar Niftəliyev

Üç gün öncə Milli Məclisdən ayda 220 manat kirayə haqqı alan deputatların siyahısı yayıldı. Report yaydı bu siyahını və bu agentliyin MM-dən götürdüyü məlumatı səhihliklə tirajladığına heç bir şübhə etmirəm.


Bu siyahıda adı çəkilən deputatlardan bəziləri artıq açıqlama verib: təsdiqləyən, evi olmadığını bildirən də var, fərqli yozumlarla vəziyyətdən çıxmağa çalışanı da.

Bir deputatın 220 manat kirayə puluna ehtiyacı olub-olmadığı tamamilə ayrı bir məsələdir. Əlbəttə, əgər həmin deputat məhz həmin məbləğə kirayədə qalarsa, problem yoxdur. Ancaq yaxşı bilirik ki, 220 manata olan kirayə mənzildə heç tələbə qala bilmir, o ki ola, deputat! Deputat ən pis halda daha şəraitli mənzildə qalır və belə mənzillərin də kirayə haqqı hər kəsə bəllidir. Deputat, məsələn, ayda min manat ödədiyi kirayə haqqının 220 manatını MM-dən alırsa, bu artıq əxlaq məsələsidir.

Haqlı səbəbdən ciddi ictimai qınağa səbəb olan bu məsələ ilə bağlı bu gün Milli Məclisin üzvü Anar Məmmədov da açıqlama yayıb. Açıqlama Milli Məclisdən göndərilib və demək ki, deputat şəxsən baxıb, təsdiqləyib. Ona görə də heç bir yanlışlıqdan söhbət gedə bilməz.

Bəs, deputat nə ünvanlayıb mediaya?

“Məsələnin mənə heç bir aidiyyatı yoxdur. Son zamanlar bəzi saytların yaydığı və həqiqəti əks etdirməyən yazıları təəssüf doğurur. Çünki Bakıda ev kirayəsi üçün Milli Məclis tərəfindən hər hansı bir vəsait almağım barədə yayılan məlumatlar tamamilə əsassızdır və heç bir fakta söykənmir. Mən nə kirayə haqqı alıram, nə də ki, kirayədə qalıram. İndiyədək də kirayə pulu ilə bağlı müraciət etməmişəm və heç bir məvacib də ödənilməyib”.

Anar Məmmədov media mənsublarına da səslənərək bildirib ki, mənim mətbuat nümayəndələrinə çox böyük hörmətim var, lakin hörmətli media nümayəndələrinə araşdırılmamış və reallığı əks etdirməyən yazılar dərc etməmələrini tövsiyə edərdim.

Anar Məmmədov gəncdir, 1984-cü il təvəllüdlüdür, 3 dil bilir, tam 4 ali təhsil alıb: Azərbaycan Texniki Universiteti (Nəqliyyat fakültəsi) və BDU-nun Hüquq fakültəsini (2005-2010) bitirib, daha sonra 2014-cü ildə Taras Şevçenko adına KMU-nun aspiranturasına daxil olub, 2017-ci ildə Azərbaycan Memarlıq və İnşaat Universitetinə qəbul olunub...

Qəbr evinə qədər oxumaq lazımdır. Ancaq başa düşmürəm, ikinci təhsili niyə 5 il alırdı ki? Nəqliyyatçı, hüquqşünas, aspirantura, sonra da memar... Fərqli ixtisaslarla insan nəyə nail olmaq istəyir? 2014-cü ildə Ukraynada aspiranturaya girəndən sonra 2017-ci ildə ölkədə Memarlıq və İnşaat Universitetinə daxil olmağın nə adı var?

Bu gənc deputat mütləq bu həyatdan nə istədiyini bilməlidir, belə olmaz. Nə istədiyini bilməməsinin səbəbi isə bugünkü açıqlamasıdır.

Əvvəla, “məsələnin mənə heç bir aidiyyatı” yox, “aidiyyəti” olar – 3 ali təhsil alıb, aspirantura bitirən şəxs gərək bunu biləydi.

İkincisi, bu məlumat Milli Məclisdən götürülüb, əgər hər hansı yanlış olsaydı, Milli Məclis özü bu məlumatı təkzib edərdi.

Aradan 3 gün keçib və Milli Məclis bütün mediada tirajlanan məlumatı rəsmən təkzib etməyibsə, məsələ aydındır!

Üçüncüsü: “Mən nə kirayə haqqı alıram, nə də ki, kirayədə qalıram. İndiyədək də kirayə pulu ilə bağlı müraciət etməmişəm və heç bir məvacib də ödənilməyib” - yazıb deputat.

Gənc deputat, sizə tövsiyə vermirəm, məhz öyrədirəm: Siz bilirsinizmi ki, “məvacib” nə deməkdir? Məvacib - maaş, əmək haqqı deməkdir, anladınızmı? Siz necə “heç bir məvacib ödənilməyib” yaza bilərsiniz? Bu məntiq və düşüncə ilə qanunların qəbulunda iştirak edirsinizsə, vay bizim halımıza!

Yayılan məlumatda sizin məvacib alıb-almamağınızdan yox, kirayə haqqı üçün 220 manat “əlavə ödənişdən” söhbət gedir.

Dördüncüsü, yazırsınız: “Mənim mətbuat nümayəndələrinə çox böyük hörmətim var, lakin hörmətli media nümayəndələrinə araşdırılmamış və reallığı əks etdirməyən yazılar dərc etməmələrini tövsiyə edərdim”.

Bu, “araşdırılmamış yazı” deyil, MM-ə istinadla yayılan xəbərdir. Xəbər, xə-bər! Siz hələ “xəbər”lə “yazı”nı ayıra bilmirsiniz?

İradınız varsa, MM-ə müraciət edin, MM rəsmi şəkildə təkzib yaysın və sizə 220 manat əlavə kirayə haqqı ödənilmədiyini rəsmən elan etsin!

Siz, ümumiyyətlə, “tövsiyə” sözünün mənasını başa düşürsünüzmü?

Mən sizdən fərqli olaraq, 4 müxtəlif, həftəbecər ixtisasa yiyələnməmişəm, bir ixtisasım və az qala sizin yaşınıza çatan media təcrübəm var. Siz hansı kriteriyalarla mənə tövsiyə verirsiniz? Yazdığınız 4 cümlədə üslub və məntiqdən tutmuş hüquqi və siyasi səhvlərə qədər, yığıb-yığışdırılması mümkün olmayan səhvlərlə mənə məsləhət verirsiniz?

Sizin yaşınız, başınız, məntiqiniz buna çatırmı?

Hörmətli gənc deputat! Sizə bu iradımız bəzi rəsmi qurumların mətbuat xidmətlərinə təsadüfi düşən şəxslərə də aiddir. Hər yerindən duran mediaya tövsiyə verib, xəbərdarlıq edə bilməz ki!

Dünyanın heç bir normal ölkəsində rəsmi şəxslər, deputatlar, dövlət qurumlarının mətbuat xidmətləri media ilə bu cür danışmır: “xəbərdarlıq”, “tövsiyə”, “məsləhət”...

Tövsiyəni ölkə başçısı verə bilər, güc strukturlarının rəhbərləri milli məsələlərdə mediaya çağırış və ya məsləhət xarakterli dəstək göstərə bilərlər.

Siz hansı yaş, hansı təcrübə ilə tövsiyə verirsiniz?

Ümumiyyətlə, hər yerindən duranın mediaya "tövsiyə verməsi" xəstəlikdir və xəstəkdən qurtulun!

Gedin, kirayə pulunuzu alıb, villalarınızda yaşayın, medianın hansı işlər gördüyünü siz heç təsəvvür belə edə bilməzsiniz!


Bizi telegram-da izləyin
Bizi facebook-da izləyin
Bizi youtube-da izləyin

Şərhlər
  • Hərbi pensiyaçı

    Cavanşir Paşazadə iki olarmış. Yol əhvalatı filmində Eldənizin ifadəsi burda yerinə düşür: İki dənə institut qurtarmışam, başımında razmeri 59 dur. Deputatların hamısından Azərbaycan dilininin qrammatikasından imtahan götürülməlidir. 125 deputatdan 5-6 nəfər istisna olmaqla qalanlarının Azərbaycan dilinin söz ehtiyatından xəbəri yoxdur. Ona görə də danışanda cümlələri "erməni budaq cümləsinə " dönür.

  • Aslan

    Anar bəyin yarımçıq olduği,bisavadlığı universitetlər gəzməsindən və heç birində ixtisas ala bilməditinə,və nəticədə nə istədiyi bəlli olmayan çuçelaya bənzədiyi və MM-ə təsadüfən kiminsə ayı xidməti nəticəsində yazıldığını təsdiqləyir.

  • Ələkbər

    Anar bəyin başının vəziyyəti də yoxlanılmalıdırşO çox ixuyub və başını itirib.Bildiyi üç dil isə yəqin Azərbaycan,bir az rus və erməni dili ola bilər.Çünki nəqliyyat,inşaat təhsilləi dil öyrətemir.O dillər universitetini oxumayıb.; Dörd universtitet qurtarması hekayəsi isə onun yarımçıqlığına aid edilə bilər.Anar bəy nə axtardığını bilməyən kimi bu universtitetlərdən bir şey tapa bilməz. odur ki, onun bisavadlığı bununla sübut olunur.Qald onun Milli əclisdə görünməsi! Bunu da onun qohumlarını araşdırsanız məsələ aydın olar.Belələrindən nə dövlət,nə millət heç zaman fayda görməyib və görməyəcək1Təsadüfi yollarla ortaya çıxarılanlar zamanın küləyi ilə gedərlər.

  • Tahir

    Anar çox yaxşı oğlandı. Bu cavan yaşında çox işlər edib, çox adama yardımlar göstərib. Biz niyə hamını qaralamağa belə mahirik? Bu yalançı kitayə söhbətjnə ona görə 3 gün sonra cavab verib ki, yəqin hözləyib ki, bu səhv məlumatı yayan agentlik və onun istinad etdiyi MM yanlışlığı düzəldər. İnsaflı olun! Deputatdır deyə düşmən gözündə niyə görürsüz!!!!!

Son xəbərlər
Çox oxunanlar
Son xəbərlər