Bu gün Azərbaycan Premyer Liqasında XI tura start verilib.
BakuPost-un APA-ya istinadən məlumatına görə, milli komandaların oyunları ilə əlaqədar yaranacaq fasilə ərəfəsindəki turun ilk günündə iki matç keçirilib.
Qəbələdə eyniadlı komanda “Səbail”i qəbul edib. Hər biri 6 matçdır qalib gəlməyən rəqiblərin duelində meydan sahibləri güclü olub.
Rəqibini 3:0 hesabı ilə darmadağın edən “Qəbələ” mövsümdə ilk ev qələbəsini qazanıb. Davit Volkovun dubl etdiyi görüşdə digər qola Ülvi İsgəndərov imza atıb. “Səbail” isə son 7 qarşılaşmada cəmi 2 xal qazanıb.
Liderin iki ən yaxın izləyicisi “Keşlə” və “Neftçi” “ASCO Arena”da qarşılaşıblar. Matçda hesab ilk yarının sonlarında açılıb. Donald Gerye “ağ-qaralar”ın heyətində ilk qolunu vurub.
Meydan sahibləri fasilədən sonra nəinki hesabda tarazlıq yaradıb, hətta qələbə qolunu da vurub. Franko Flores və Sezar Meza Kolli qonaqları məyus edib. Nəticədə “Keşlə” 2-ci pilləni rəqibindən alıb.
Bu, “Qarabağ”a qış çempionluğunu indidən təmin etmək üçün imkan yaradıb. Ağdamlılar sabah “Zirə”yə qalib gəlsə, qış fasiləsinə üç tur qalmış ilk yarını 1-ci yerdə başa vuracaqlarını rəsmiləşdirəcək.
Qeyd edək ki, tura sabah yekun vurulacaq. “Qarabağ” “Zirə”ni, “Sabah” “Sumqayıt”ı qəbul edəcək.