Paris talan edildi, avtomobillər yandırıldı VİDEO

Minlərlə insan Port-de Lila meydanından Respublika meydanına doğru yürüş edib. Aksiya zamanı polislə qarşıdurma yaşanıb. Hüquq-mühafizə orqanının əməkdaşları etirazçılara qarşı gözyaşardıcı qaz bombalarından istifadə edib.

Bundan sonra Parisdə talanlar başlayıb. Qara rəngli eyni gödəkçələr geyinən bir qrup şəxs mağazaların şüşələrini qırıb, vitrinlərini dağıdıblar, bankların pəncərələrini, dayanacaqların şüşələrini sındırıblar. Onlar həmçinin, avtomobilləri yandırıblar. Aksiyaçılar hadisə yerinə gələn yanğınsöndürənlərə daş və butulka ataraq onların işinə mane olublar.

Gözyaşardıcı qaz və tüstü səbəbindən paytaxt küçələrində hərəkət çətinləşib.

Mitinqçilərin çoxu tanınmamaq üçün üzlərini bağlayıblar. Bununla belə, polis artıq bir neçə aksiyaçını saxlayıb.

Qeyd edək ki, “Qlobal təhlükəsizlik haqqında” Qanun layihəsinin 24-cü maddəsinə əsasən, polisin və ya hüquq-mühafizə orqanı əməkdaşlarının xidməti zamanı jurnalistlər tərəfindən foto-video çəkilişlərinin aparılması qadağan edilir.