2 məşhur klinikanın həkimindən “Sabah”ın baş məşqçisi ilə bağlı qeyri-etik paylaşım – Xəstə məxfiliyini pozdular

“Bakupost” xəbər verir ki, noyabrın 25-də Bakıda UEFA Çempionlar Liqasının liqa mərhələsində Azərbaycan çempionu “Sabah” İspaniyanın “Barselona” komandası ilə qarşılaşacaq.

Həkim Elbəyi Daşdəmirli “Sabah”ın baş məşqçisi Valdas Dambrauskasla fotosunu sosial şəbəkə hesabında paylaşıb. Həkimin paylaşımına şərh yazan digər həkim Y.Haxverdiyev isə “Sabah”ın sözügedən oyunda “Barselona”ya məğlub olacağına eyham vuraraq, həmin tarixdə “Barselona”nın baş məşqçisi Hans Flikin Valdasa prostat müayinəsi aparacağını yazıb:

“Abi, noyabrda məşhur alman uroloqu Hans Flik Bakıda bu müəllimə prostat müayinəsi icra edəcəkmiş deyirlər...”.

E.Daşdəmirli isə “Elə həmin oyuna hazırlayıram” cavabını verərək Valdas Dambrauskasın onun pasiyenti olduğunu və tibbi müalicə aldığına dair məlumatı ictimai şəkildə açıqlayıb.

Həkimin pasiyentinin tibbi məxfiliyini pozaraq onunla bağlı məlumatı sosial şəbəkədə paylaşması, həm də bunu zarafat və sarkazm formasında etməsi istifadəçilər arasında narazılığa səbəb olub.

Yazışmaya münasibət bildirən jurnalist İlhamə Qasımlı da həkimlərin sosial mediada pasiyentlər üzərindən bu formada ünsiyyət qurmasını sərt tənqid edib. Onun sözlərinə görə, məqsəd zarafat olsa belə, pasiyentin diaqnozu və müayinəsinin ictimai müzakirəyə çıxarılması həkim etikası baxımından ciddi suallar doğurur.

"Ölkənin iki ən prestijli, ən elit və ən lüks xəstəxanasının uroloq və travavmatoloqunun sosial şəbəkədə hər kəsə açıq paylaşımda pasiyenti müzakirə üslubu... Hər ikisi də pasiyent məxfiliyi (hasta mahremiyeti) prinsipinin önəm verildiyi Türkiyə tibb təhsilinin yetirməsidir. Qapalı vatsap qrupu olsa, bəlkə "iki həmkar arasında olan zarafat" donu geyindirilərdi. Amma hər kəsə açıq platformada ölkənin tanınmış idman mütəxəssisi olan pasientin müayinəsini bu şəkildə müzakirə etmək etimad və məxfilik şərtlərinə kölgə salır. Niyyət nə olursa olsun, pasiyentin diaqnozu, müayinəsi üzərindən məzəli və ya sarkazmlı ünsiyyət qurmaq həkim etikasının əsas prinsiplərinə ziddir.

Bir həkimin peşəkarlığı və məsuliyyəti yalnız onun müayinə və ya cərrahi əməliyyat bacarığı ilə bitmir. Həkimlik, eyni zamanda etik prinsiplərə sadiqlik, pasiyentin ləyaqətinə hörmət və onun şəxsi tibbi məlumatlarının qorunması məsuliyyətidir".

İ.Qasımlı sonda Səhiyyə Nazirliyinin Etik Komissiyasının olub-olmadığını bilmədiyini qeyd edib və belə bir qurum varsa, bu cür paylaşımların hüquqi və etik tələblər baxımdan qiymətləndirilməsinin vacibliyini vurğulayıb.

"Xəstələr müayinədən sonra həkimin sosial media hesablarında müzakirə obyekti və ya "məzələnmə" materialı olacağını düşünməməlidir".