33 il sonra nəşi tapılan şəhidin anası: "Oğlum sinəsini qabağa verib, 80 nəfəri..."

“O, yoldaşları ilə birlikdə 80 nəfər vətəndaşı xilas etmişdi. O vaxt bütün Kəlbəcər çıxsa da, onların zastavası çıxmamışdı. Onlar Kəlbəcərin kəndlərində qalan 80 nəfəri də götürüb, Murov dağın aşaraq, ac-susuz Meydançaya gəlib çatıblar. Görüblər ki bir dam var, tüstü gəlir. Komandir oğlumu göndərib kəşfiyyata. Bu da gedib qapını açanda görüb ki, içəridəki ermənidir. Oradan haraylayıb ki, qaçın, ermənilər sizi vuracaq. Hamı qaçıb gizlənib, mənim oğlum qaça bilməyib. Arxadan atəş açaraq ayağından vurublar. Bir neçə gün sonra bir-bir, iki-iki hamı gəldi, amma mənim oğlum gəlmədi. Torpaqlarımız geri alındıqdan sonra yoldaşları onun nəşini gedib tapıblar...”