ABŞ Beynəlxalq Cinayət Məhkəməsinin ləğvinə çalışır: Qərarlar xoşuna gəlmir

"Bakupost" xəbər verir ki, bu barədə CNN məlumat yayıb.

İddialara görə, Ağ Ev BCM-in Əfqanıstanda ABŞ hərbçilərinin ehtimal olunan müharibə cinayətlərini araşdırmasından narahatdır.

Qeyd edək ki, 2002-ci ildə, çoxtərəfli Roma Statutu əsasında yaradılmış BCM fərdləri soyqırım, insanlığa qarşı cinayətlər, müharibə cinayətləri və təcavüz cinayəti kimi beynəlxalq cinayətlərə görə mühakimə etmək səlahiyyətinə malik yeganə daimi beynəlxalq məhkəmədir.

Yarandığı gündən etibarən BCM ciddi tənqidlərlə məruz qalıb. Məhkəməyə qoşulmayan böyük dövlətlər başda olmaqla, opponetlər onun legitimliyini şübhə altına alır, milli suverenliklə bağlı narahatlıqları və siyasi təsirə məruz qala bilməsini əsas gətirirlər. Məhkəmə həmçinin qərəzlilikdə və Afrika liderlərini qeyri-mütənasib şəkildə hədəf almaqda ittiham olunub.

Xatırladaq ki, BCM Rusiya lideri Vladimir Putin, həmçinin İsrail baş naziri Netanyahu və müdafiə naziri Yoav Qallant barəsində həbs orderi də verib.

Hüquqşünas Qulamhüseyn Əlibəyli "Bakupost"a bildirib ki, ABŞ-nin BCM-i ləğv etməsi mümkün deyil:

“BCM-ni təkcə ABŞ yaratmayıb. Bütün Avropa ölkələri və dünyanın əksər dövlətləri həmin BCM-ni tanıyır və onun üzvüdür. Yəni ABŞ belə bir qurumu özü təkbaşına yaratsaydı, bəlkə də ləğv edə bilərdi”.

“Düzdür, burada Putin, Netanyahu, ABŞ hərbçilərinin Əfqanıstandakı əməllərilə bağlı xeyli problemlər var. Amma hesab edirəm ki, BCM-in ləğvi məsələsi gündəmdə deyil”.

“Vaşinqton quruma təzyiq etmək istədiyindən, belə açıqlamalarla çıxış edir”.