“Ay işıqsız gecə”də hücum – ABŞ-nin müharibə planları

ABŞ prezidenti Donald Tramp və İsrail baş naziri Benjamin Netanyahu İranla bağlı mümkün hərbi əməliyyat planları müzakirə edir.

Bakupost.az ABŞ mediasına istinadən xəbər verir ki, analitiklər müzakirələrin gedişatını proqnozlaşdırmaqda çətinlik çəkirlər.

Məlumatlara görə, ABŞ bölgəyə hərbi hava qüvvələrinin rekord həcmdə yerləşdirilməsi və dəstək texnikasının göndərilməsi ilə 2003-cü ildən bəri görünməmiş hərbi hazırlıqları həyata keçirib. Həmçinin logistika və hava körpüləri hələ də tam sürətlə işləyir.

Hərbi planlayıcılar, əməliyyatın “ay işıqsız gecə” dövründə həyata keçirilməsini üstün tuturlar və bu dövr martın ortasında baş verir. Bununla belə, müasir aviasiya sistemləri gecə hücumları üçün əvvəlki kimi tam gizlilik təmin etmir.

Eyni zamanda, Oman vasitəçiliyi ilə ABŞ və Rusiya arasında dolayısı ilə danışıqlar planlaşdırılır. Bu görüş regionda sülh təşəbbüslərinin davamı kimi qiymətləndirilir.

Prezident Tramp üzərində təzyiq çoxşaxəlidir. İsrail və xristian, yəhudi sionistlər əməliyyatı mümkün qədər tez həyata keçirməsini istəyir. ABŞ hərbi rəhbərləri isə uzun müddətli yerləşdirmənin hərbi imkanlara ziyan vuracağı narahatlığını bildirir. Eyni zamanda, ərəb və müsəlman ölkələri hərbi əməliyyatın qarşısını almağa çalışır.

Sorğulara görə, ABŞ seçicilərinin 70%-dən çoxu İranla müharibəyə qarşıdır. İran isə nüvə silahı istehsal etməyəcəyinə zəmanət verərək, uranın zənginləşdirilməsini sınaq üçün yetərli olmayan səviyyədə saxlamağa hazır olduğunu açıqlayıb.

Rusiya və Çin İranı silah və kəşfiyyat dəstəyi ilə qeyri-adi şəkildə təmin edib, bu da ABŞ-ın əməliyyatları dayandıraraq diplomatik həll yollarını araşdırmasına təkan verib.


Ekspertlər bildirir ki, Tramp əməliyyatın tez və effektiv olacağına zəmanət alana qədər hücumu əmr etməyəcək. Uzunmüddətli müharibə isə ABŞ üçün ciddi risklər doğurur, çünki hava müdafiə raketləri və “Tomahawk” kruiz raketləri üçün zəruri xammal istehsalında tədarük zənciri zəifdir və Çin bəzi əsas mineralları vermir.

Analitiklər bu gərginliyi “Taxt-tac oyunları” kimi mürəkkəb intriqalar zənciri olaraq qiymətləndirir, lakin qeyd edirlər ki, hazırkı diplomatik səylər və regional təzyiqlər müharibənin dərhal başlamasının qarşısını alır.

Cavid, BakuPost