"Azərbaycanda qida problemi yaşanır" - Eyyub Hüseynov

AQTA-nın yaydığı məlumata görə, yoxlama zamanı xəmir yoğurma sahəsində çirkab suyun toplandığı, anbar sahəsində havalandırma sisteminin quraşdırılmadığı, divar və tavanda bəzi hissələrin tamlığının pozulduğu, emal sahəsinin normativlərə cavab vermədiyi və müvafiq təmizlik işlərinin aparılmadığı məlum olub. Faktla bağlı müəssisə rəhbərliyi barəsində inzibati protokol tərtib olunub, nöqsanların aradan qaldırılmasına dair göstərişlər verilib.

“Bu gün insanlar çörək sexlərindəki vəziyyətdən xəbərsizdirlər. Əgər bir ictimai təşkilat, KİV nümayəndəsi o çörək sexinə gedib vəziyyəti araşdırmaq istəsə, qapıları onların üzünə bağlayacaqlar. Deyəcəklər ki, hökumətin qərarı var, içəri daxil olmaq olmaz. Azərbaycanda biznes qurumlarına qeyri-adi, dünyanın heç bir yerində olmayan toxunulmazlıq şəraiti yaradılıb. Biznes qurumlarını heç kim yoxlaya bilməz. Lakin biznes qurumları bundan sui-istifadə edirlər. Hökumətin bu cür əhəmiyyətli siyasətini qiymətləndirə bilmirlər. Ancaq hökumətin bu siyasətində bir səhv var. O da ondan ibarətdir ki, qida səhəsində yoxlamalar xəbər verilmədən, operativ aparılmalıdır. İstənilən zaman Qida Təhlükəsizliyi Agentliyi bu müəssisələrdə yoxlamalar apara bilməlidir. Təəssüf ki, bu gün o imkan yoxdur. İstehlakçıların hüquqlarına dair qanunda ancaq mənfi dəyişikliklər edilib. Bu sahə ilə məşğul olan dövlət qurumlarının zəif işlədiyi bir şəraitdə belə xoşagəlməz hallar baş verəcək”.

“Bizdə qidanın təhlükəsizliyi ilə məşğul olurlar, amma keyfiyyət kənarda qalıb. Qida təhlükəsizliyi ilə bağlı əsasnaməni oxusaq, keyfiyyət barədə heç nə yoxdur. Təhlükəli qida insanı bir anda öldürür, keyfiyyətsiz qida isə apteklərdə, klinikalarda növbələrin yaranmasına səbəb olur”.