Başıbəlalı “Taxta bazarı” - Köçürülmə yenidən gündəmdə

Bakupost.az xatırladır ki, cəmi bir neçə ay əvvəl - bu ilin martında da bazarda güclü yanğın olmuşdu. Xoşbəxtlikdən insan itkisi qeydə alınmamışdı.

Bəs, niyə bu bazarda tez-tez yanğın hadisələri olur və onun köçürülməsini zəruri edən daha hansı səbəblər var?

Təhlükəsizlik üzrə ekspert Samir Nəbiyev Bakupost.az -a açıqlamasında bildirib ki, bazarın şəhərdən kənara köçürülməsi daha əlverişlidir:

Bu ərazi şəhərsalma baxımından da ciddi narahatlıq doğurur. Dərnəgül qovşağı adlanan bu yer həm də yol şəbəkələrinin kəsişdiyi strateji bir nöqtədir. Burada geniş yolların çəkilməsi, nəqliyyat axınının rahatlaşdırılması, yaşıl parkların salınması və yeni yaşayış komplekslərinin tikintisi nəzərdə tutulur. Lakin bazar bu planların qarşısında ciddi maneə olaraq qalır. Şəhərin mərkəzində geniş bir ərazidə bu cür xaotik və təhlükəli bir obyektin mövcudluğu müasir Bakının konsepsiyasına uyğun gəlmir.

Bütün bu səbəblərdən artıq bir neçə ildir ki, "Taxta bazarı"nın Qaradağ rayonuna köçürülməsi müzakirə olunur. Qaradağ rayonu daha geniş və az sıxlıq olan ərazidir, burada bazarın müasir formada, bütün təhlükəsizlik tələblərinə cavab verən şəraitdə yenidən qurulması mümkündür. Bu həm satıcılar, həm də alıcılar üçün daha rahat və nizamlı bir mühit yaradacaq. Eyni zamanda şəhər mərkəzi də illərdir mövcud olan bir yükdən azad olacaq.