"Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz Bakı-Tiflis marşurutu üzrə qatarların hərəkətinin bərpası fonunda Azərbaycan Dəmir Yolları QSC-nin müəyyənləşdirdiyi qiymətlərə özünün feysbuk səhifəsində münasibət bildirib.
Bakupost.az xəbər verir ki, O.Gündüz qurumun qiymət siyasətinin heç bir məntiqə sığmadığını deyib.
“ADY bu tip ağlasığmaz qiymət siyasətini əvvəllər Bakı-Balakən qatarında sınaqdan keçirdi. Qurum ala yarımçıq, çox ehtiyatla açıqlama yayıb. Mətləbə heç bir dəxli olmayan 51 manatı önə çıxarır. Kupe və SV-nin qiymətini hələlik gizli saxlayır”.
Bakıdan Tiflisə biletin 81 manat olduğunu deyən ekspert 2019-cu ilədək olan qiymətləri də göstərib:
“Plaskart -24-26 manat, kupe-35-40 manat və SV (yataqlı)-57-60 manat”.
O qeyd edib ki, ADY məsələyə "Bakı-Balakən qatarı" prinsipilə yanaşacaqsa, Bakı-Tbilisi reysi üçün ağlasığmaz görünsə də, kupe və SV qiymətləri belə ola bilər:
“Kupe -120 manat, SV-230 manat”.
Mərkəz direktoru güman edir ki, ADY hökumətdən subsidiya ala bilmədiyindən, həmin vəsaitləri əhalidən almağı hədəfləyib:
“Hökumətin belə ağlasığmaz qiymətlərə imkan verib-verməyəcəyini bilmirəm, amma görünən odur ki, hər hansı hesablamaya və reallığa uyğun gəlməyən, ağlabatan olmayan bir qiymət təklif olunub”.
Rüfət Sultan, BakuPost
MEDİA