Bakıda oğul atasını məhkəməyə verdi

Hadisə ötən il dekabrın 25-də baş verib. Cəbrayıl rayon sakini, 1980-ci il təvəllüdlü Rahil həmin gün, gecə saat 02 radələrində yaşadıqları evin yataq otağında oğlu Zaur (adlar şərtidir – red.) ilə mübahisə edib.

Bu zaman Zaur atasına qarşı nalayiq ifadə işlədib. Bundan qəzəblənən ata aralarında yaranmış mübahisə zamanı əli ilə oğlunun üz nahiyəsindən bir dəfə vurub və ona xəsarətlər yetirib.

Faktla bağlı Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.

Məhkəmədə təqsirləndirilən şəxs ifadəsində zərərçəkmiş şəxslə barışdığını söyləyib. Zərərçəkmiş şəxs də təqsirləndirilən şəxslə barışdığını, ona dəymiş ziyanın tam ödənildiyini və təqsirləndirilən şəxsə qarşı şikayət və tələbinin olmadığını bildirib.

Sabunçu Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxs cinayət məsuliyyətindən azad edilib. İş üzrə icraata xitam verilib.//Demokrat.az