Bayramda ağır yeməklərdən əvvəl edilməsi vacib olan qızıl qaydalar

Bakupost.az Demokrat.az-a istinadən xəbər verir ki, ağır ət yeməkləri və şirniyyat ikramları səbəbindən bayram dövrü mədə şikayətlərinin ən çox artdığı vaxtdır. Orqanizmdə bu qəfil dəyişiklik həzm sistemi xəstəliklərini birbaşa tətikləyə bilər. Problem yaşamamaq üçün bayram səhəri yüngül qidalanmaq, ətin hazırlanma üsuluna diqqət etmək və ağır şirniyyatlardan uzaq durmaq tövsiyə olunur. Həssas mədəsi olan şəxslərin bu prosesdə düzgün addımlar atması rahat bayram keçirməyə kömək edir.

Bayramdakı ağır yeməklərə başlamazdan əvvəl orqanizmi tədricən yüngül qidalanmaya alışdırmaq lazımdır. Bu dövrdə tərəvəz əsaslı yeməklərə üstünlük vermək, yumurta, ət və küftə kimi proteinli qidaları mümkün qədər azaltmaq mədəni rahatladır. Porsiyaları kiçik saxlamaq və balanslı menyu qurmaq həzm sistemini qarşıdakı yükə hazırlayır.

Bayram günlərində tətbiq oluna bilən sadə bir yanaşma var: günə mədəni yormayan, təzə göyərti ilə zəngin yüngül səhər yeməyi ilə başlamaq. Yeməklərdə yağ miqdarını azaltmaq üçün ətləri öz yağında bişirmək və bədəni susuz qoymamaq vacibdir. Bundan əlavə, həzm sistemini çətinləşdirən xəmir və şirniyyatlardan uzaq durmaq, gün ərzində qısa gəzinti və yüngül hərəkət etmək tövsiyə olunur.

Ağır ət yeməklərindən sonra yaranan şişkinlik və həzmsizliyi azaltmaq üçün rezene və ya kəklikotu kimi bitki çaylarından istifadə edilə bilər. Bu çaylar yeməkdən təxminən 30–60 dəqiqə sonra içilməlidir. Lakin bitki çaylarını həddindən artıq istifadə etmək olmaz: nəzarətsiz və çox miqdarda qəbul qaraciyəri yora və ciddi sağlamlıq problemlərinə səbəb ola bilər. Gündə bir stəkanla məhdudlaşdırmaq daha təhlükəsiz sayılır.