Çin-ABŞ rəqabəti: Dünyaya lazım olan əzəli mübarizə başlayır?

Bakupost.az xəbər verir ki, bunu Çin xarici işlər nazirinin müavini Ma Caosyü mətbuat konfransında bəyan edib.

"Ölkəmizin suverenliyini, təhlükəsizliyini və inkişaf maraqlarını qətiyyətlə müdafiə edəcəyik. Çinin inkişafını və böyüməsini dayandırmaq, yaxud Çin millətinin böyük dirçəlişinə mane olmaq cəhdləri iflasa məhkumdur", - Ma Caosyü bildirib.

O qeyd edib ki, Vaşinqtonun Pekinə qarşı təzyiqə əsaslanan siyasəti işə yaramayacaq.

"Biz ABŞ ilə qarşılıqlı yaxınlaşma, dövlət başçıları arasında əldə olunmuş mühüm razılaşmaların həyata keçirilməsi, daimi təmasların qorunması, fikir ayrılıqlarının aradan qaldırılması, əməkdaşlığın genişləndirilməsi və Çin ilə ABŞ-nin yeni dövrdə birgə mövcudluğu üçün düzgün yolun axtarışı istiqamətində əməkdaşlığa hazırıq", - deyə Caosyü əlavə edib.

Nazir müavini onu da xatırladıb ki, cari ilin əvvəlindən bəri Çin Xalq Respublikasının sədri Si Cinpin ABŞ prezidenti Donald Trampla iki dəfə telefonla danışıb və bir neçə dəfə məktub mübadiləsi aparıb. Onun sözlərinə görə, bu, Pekinin Çin-ABŞ münasibətlərinin gələcək inkişafı üçün kursunu müəyyən etdiyini göstərir.

Politoloq Kənan Novruzov Musavat.com-a bildirib ki, iki böyük güc, yəni Pekinlə Vaşinqton arasında uzun müddətdir mübarizə gedir:

"Tərəflər bir-birlərinin hegemonluğunu qəbul etmir, müxtəlif yollarla bir-birlərini zəiflətməyə çalışırlar. Doğrudur, tərəflər arasında açıq müharibə başlamayacaq. Bunu nə Pekin istəyir, nə də Vaşinqton. Çünki bu, faktiki olaraq üçüncü dünya savaşı deməkdir. Ancaq iqtisadi müharibə davam edir. Və yəqin ki, gələcəkdə daha da güclənəcək. Tərəflər qlobal bazarlarda bir-birləri ilə mübarizə aparmaqdan, "bazarlarını öldürməkdən" əl çəkməyəcəklər.

Bütün cəhdlərə, maneələrə baxmayaraq, rəsmi Pekin beynəlxalq siyasətdə, o cümlədən qlobal iqtisadiyyatda öz hegemonluğunu qorumağı bacarır. Yəqin ki, hələ uzun müddət də belə olacaq.

Nə qədər paradoksal görünsə də, əslində bu rəqabət həm tərəflərin özlərinə, həm də bütün dünyaya lazımdır. Çünki məhz bu mübarizə nəticəsində ikiqütblülük təmin olunur, qlobal iqtisadiyyatdakı tarazlıq qorunur.

Fikrimcə, planet hələ Çin- ABŞ rəqabətinin nəticəsinə hazır deyil".