Deputatın taksilərlə bağlı təklifinə reaksiya: “Hamıya şamil edilməlidir”

Müxtəlif ərazilərdə, o cümlədən sosial obyektlərin qarşısında sərnişinlərin taksidən minib düşməsi üçün şəraitin olmadığından şikayətlənən deputat bildirib ki, taksi sürücüsü cərimələnməmək üçün gedib 200-300 metr kənarda saxlamaq məcburiyyətində qalır.

Bu isə deputatın fikrincə, həm də sərnişinlər, xüsusən də yaşlılar, uşaqlı ailələr üçün çətinlik yaradır.

“Polisə dəstək” İctimai Birliyinin sədri, hüquqşünas Şəmsəddin Əliyev Bakupost.az-a bildirib ki, Milli Məclisin deputatı tərəfindən səslənən fikirlə qismən razıdır.

Belə ki, həmsöhbətimiz hesab edir ki, sözügedən şərait təkcə taksi sürücülərinə deyil, sükan arxasında olan hamıya şamil edilməlidir:

“Hüquqi dövlətimizin qanunçuluq, bərabərlik sahəsində ümumi prinsipləri var. Bu əsasda da təklif yalnız taksilərə şamil edilməməlidir. Digər avtomobil sahibləri də anoloji vəziyyətlə üzləşirlər. Hər bir avtomobil sahibi zəruri şəraitdə 2-3 dəqiqə lazım olmayan yerdə saxlamaq məcburiyyətində qalır. Ona görə də səslənən təklif bütün sükan arxasında əyləşənlərə şamil edilməlidir. Bütün zəruri ehtiyac duyulan alış-veriş məkanları, apteklər, ərzaq dükanları, marketlərin hamısı yol kənarındadır. Buna görə də qaydalar hamıya şamil olunmalıdır”.