Diqqət! Komendant pulunu ödəməyə bilərsiniz

Bəs qanunvericiliyə əsasən, mənzil sahiblərindən hər ay kvadratmetrə görə komendant pulu və ya kommunal haqqı tələb oluna bilərmi?

Bakupost.az xəbər verir ki, Globalinfo.az-a danışan vəkil Ramil Süleymanov kommunal xidmətlərlə bağlı MTK və ya MMC-lərlə sakinlər arasında bağlanan müqavilə əsas sənəddir deyib:

“Xidməti göstərən tərəf xidmət haqqını müəyyən və təqdim edir, sakinlər isə müqaviləni imzalamaqla həmin şərtlərlə, o cümlədən qiymətlə razılaşmış olurlar”.

Vəkil bildirib ki, əgər sakinlərin təqdim olunan qiymətlərlə bağlı etirazları varsa, onlar ya müqaviləni imzalamaqdan imtina etməli, ya da öz təklif və qeydlərini bildirərək müqaviləni imzalaya bilərlər:

“Bununla yanaşı, sakinlər bina rəhbərliyinin müəyyən etdiyi xidmət haqları ilə razılaşmırlarsa, Azərbaycan Respublikasının Mənzil Məcəlləsinin tələblərinə uyğun olaraq hüquqi şəxs yarada və binanın idarə olunmasını, o cümlədən kommunal xidmətlərin təşkilini özləri həyata keçirə bilərlər”.

R.Süleymanovun sözlərinə görə, tərəflər arasında bağlanmış müqavilə əsasında xidmət haqqının hər kvadratmetrə görə müəyyən edilməsi mümkündür:

“Qeyd edim ki, qüvvədə olan qanunvericilikdə bununla bağlı hər hansı məhdudiyyət nəzərdə tutulmayıb”.