Dörd nəfərlik ailə üçün 1200 manat – Deputatın sözlərinə iqtisadçıdan CAVAB

Deputatın sözlərinə görə, hazırda 65 mindən çox aktiv vakansiyanın olması əmək bazarında müəyyən hərəkətliliyin göstəricisidir. Lakin əsas məsələ bu vakansiyaların vətəndaşların peşəsinə, ixtisasına, yaşadığı əraziyə və əməkhaqqı gözləntilərinə nə dərəcədə uyğun olmasıdır.

Bəs Azərbaycanda 4 nəfərlik ailənin normal, orta səviyyədə yaşaması üçün ayda nə qədər vəsait lazımdır? Mövcud vakansiyalarla ailəni dolandırmağa imkan verən iş tapmaq mümkündürmü?

"Bakupost" xəbər verir ki, Globalinfo.az-a danışan iqtisadçı Günay Hüseynova məşğulluq siyasətinin rəqəmsallaşdırılmasını və ƏMAS platformasının tətbiqini müsbət və təqdirəlayiq addım hesab etdiyini bildirib.

İqtisadçı deputatın 400-600 manatla ailə dolandırmağın mümkün olmadığı barədə fikrinə münasibət bildirərkən qeyd edib ki, cəmiyyətin əksər hissəsi hazırda minimum əməkhaqqı və ya ondan cüzi yüksək məbləğ qarşılığında işləyir:

“400-600 manatla ailə dolandırmaq hazırda cəmiyyətin böyük hissəsi üçün faktiki reallıqdır. İnsanlar bu məbləğlə dolanmağa çalışırlar. Əsas məsələ yalnız əməkhaqqının məbləği deyil, tətbiq olunan sistem və şərtlərdən vətəndaş məmnuniyyətinin təmin edilməsidir”.

G.Hüseynova bildirib ki, sosial şəbəkələrdə və iş elanları platformalarında əmək qanunvericiliyinə zidd şərtlərlə vakansiyalara rast gəlinir. Onun sözlərinə görə, elanlarda 12-14 saatlıq iş və qarşılığında 400, ən yaxşı halda 600 manat əməkhaqqı təklif olunur.

gunay

Günay Hüseynova

G.Hüseynova 4 nəfərlik ailənin normal yaşayışı üçün tələb olunan məbləğin ailənin yaşayış şəraitindən və yerləşdiyi ərazidən asılı olduğunu bildirib:

“Hər ailənin xərcləri müxtəlifdir. Elə ailələr var ki, ev büdcəsinə 5 000 manat daxil olsa belə, xərclərini qarşılaya bilmədiyini deyəcək. Elə ailələr də var ki, 600 manat əməkhaqqı ilə xərclərini qarşılaya bilir. Bundan əlavə, şəxsin yaşadığı yer də önəmlidir. Böyük şəhərlərdə, xüsusilə şəhər mərkəzində yaşayan insanların xərcləri şəhər kənarında, kənd və rayonlarda yaşayanlarla müqayisədə daha çoxdur. Hesab edirəm ki, evi olan, borc və kredit öhdəliyi olmayan 4 nəfərlik ailəyə ümumilikdə ayda 1000-1200 manat vəsait kifayət edə bilər”.

Əmək bazarındakı vakansiyaların ailəni dolandırmağa imkan verən gəlir təmin edib-etmədiyinə gəlincə isə, iqtisadçı burada şəffaflığın əsas məsələlərdən biri olduğunu qeyd edib:

“İlk növbədə baxmaq lazımdır ki, şəffaflıq hansı dərəcədə qorunur. Qohumluq, yerlibazlıq, minimum əməkhaqqı ilə yüksək tələblər qoyulması hansı səviyyədədir?”