Ərdoğan ABŞ-İran razılaşmasından yazdı

Bakupost.az xəbər verir ki, Türkiyə lideri bununla bağlı "X" sosial şəbəkəsində paylaşım edib.

Ərdoğan bildirib ki, tərəflər arasında əldə edilən anlaşma Yaxın Şərqdə sülh və əmin-amanlığın təmin olunmasına xidmət edə biləcək vacib inkişafdır.

Prezident vurğulayıb ki, dünya ictimaiyyətinin uzun müddətdir gözlədiyi bu nəticənin bölgədə davamlı sülhün və təhlükəsizliyin formalaşmasına töhfə verəcəyinə ümid edir. O, sazişin rəsmiləşdirilməsinə qədər olan müddətdə gərginliyi artıracaq bəyanatlardan və təxribat xarakterli addımlardan uzaq durmağın vacibliyini qeyd edib.

Ərdoğan əldə olunan nəticədə rol oynayan bütün tərəflərə təşəkkürünü ifadə edib. Xüsusilə Pakistanın vasitəçilik səylərini yüksək qiymətləndirən Türkiyə lideri, Qətər və Səudiyyə Ərəbistanının diplomatik prosesə verdiyi dəstəyi də təqdir edib.

Dövlət başçısı əlavə edib ki, Türkiyə bundan sonra da regionda sülhün, sabitliyin və qarşılıqlı anlaşmanın gücləndirilməsinə yönəlmiş təşəbbüsləri dəstəkləyəcək, diplomatiya və beynəlxalq hüquqa əsaslanan həll yollarına töhfə verməyi davam etdirəcək.