Kiyevin Rusiya hava məkanını hədəf alması: Moskva geri çəkiləcək?

“Bakupost” xəbər verir ki, “Rosaviasiya” təyyarələrin eniş və uçuşuna müvəqqəti məhdudiyyətlərin tətbiq edildiyini bildirib. Məlumata görə, nəticədə bu günə qədər “Şeremetyevo” aeroportunda 21 uçuş ləğv edilib və 235 uçuş isə gecikib. “Vnukovo” aeroportunda isə da 22 uçuş ləğv edilib və 94 uçuş gecikib.

Qeyd edək ki, sentyabrın 1-də Ukrayna Prezidenti Volodimir Zelenski Telegram kanalında aviaşirkətlərə və sığortaçılara Ukraynanın Rusiya hərbi qüvvələrinin mülki infrastrukturlara hücumlarına cavab olaraq Rusiya ərazisinə dron hücumlarını gücləndirəcəyi barədə xəbərdarlıq edib. Ukraynanın xarici işlər naziri Andrey Sibiqa isə Beynəlxalq Mülki Aviasiya Təşkilatını (ICAO) təhlükəli Rusiya hava məkanı barədə rəsmi olaraq məlumatlandırıb.

Siyasi şərhçi Məhəmməd Əsədullazadə “Bakupost”a bildirib ki, Ukrayna Prezidentinin Rusiya hava məkanının artıq təhlükəli olduğunu, PUA-la bu ölkəyə geniş həcmli zərbələrin endiriləcəyini vurğulaması daha böyük müstəvidə beynəlxalq ictimaiyyətin diqqətini davam edən müharibəyə yönəltmək, savaşa son qoymaq üçün Moskvaya təzyiqlərin artırılmasına nail olmağa hesablanmış addımdır:

“Sözügedən xəbərdarlıq mülki aviasiya üçün təhlükəlidir. Ona görə də yaranmış vəziyyətdə Rusiyaya uçuşlar əhəmiyyətli səviyyədə dayanacaq. Rusiyaya turist və sərnişinlərin gedişinə ciddi təsir göstərəcək. Həmçinin, Rusiyadan başqa ölkələrə uçuşlarda da anoloji vəziyyət yaranacaq. Bütün bunlar son olaraq Rusiyanın iqtisadi imkanlarını daha da daraldacaq”.

“Amma bu, Moskvanın öz siyasətində müəyyən dərəcədə korrektlər etməsinə gətirib çıxara bilər”.

“O da öz növbəsində Ukrayna aeroportlarını vura bilər. Putin də yaranan vəziyyətə rəğmən geriyə doğru hansısa bir addım atmayacaq. Əksinə, prosesi təbliğat maşınına çevirərək, NATO hücumlarının artdığını bəyan etməklə, hərbi səfərbərliyi daha da genişləndirəcəklər”.