Luvr qiymətləri 45 faiz qaldırdı – Yerli oğruların zərərini əcnəbi turistlər ödəyəcək

Fransanın paytaxtı Parisdə yerləşən Luvr Muzeyi 2026-cı ildən etibarən Avropa Xarici İqtisadi Zonası (AB üzvü ölkələr, Norveç, İslandiya və Lixtenşteyn) xaricindən gələn ziyarətçilər üçün giriş haqqını 45% artıracaq. Yeni tarifə görə, yanvarın 14-dən etibarən AB xaricindən gələn ziyarətçilər muzeyə daxil olmaq üçün 32 avro ödəyəcək ki, bu da indiki qiymətdən 10 avro (45 faiz) çoxdur.

Bakupost.az Fransa KİV-nə istinadən xəbər verir ki, artım, xüsusilə Luvru ziyarət edən əcnəbilər arasında ən böyük qrup olan ABŞ və Çin vətəndaşlarını əhatə edəcək. Məlumatlar muzeyin fəaliyyət hesabatına əsaslanır.

Luvr keçən il 8,7 milyon ziyarətçi qəbul edib və onların 69%-i əcnəbilər olub.

Giriş haqqının artırılması ilə muzey struktur problemlərini həll etməyi və dünyanın ən çox ziyarət edilən sənət muzeyinin yenidən qurulmasını maliyyələşdirmək üçün ildə 20 milyon avro gəlir əldə etməyi planlaşdırır. Muzey hələ də keçən ay baş vermiş nadir əsərlər oğurluğunun təsirlərindən çıxmağa çalışır.

19 oktyabrda Luvrda dörd nəfərlik bir qrup yalnız yeddi dəqiqə ərzində 88 milyon avro dəyərində zinət əşyalarını oğurlayıb və skuterlərlə qaçmışdı. Rəsmi araşdırmalara görə, muzeyin təhlükəsizlik sistemləri yetərsizdir. Yeni əsərlərin alınmasına böyük büdcələr ayrılan muzeydə texniki xidmət və bərpa işlərinə çox az vəsait sərf olunub.

Bu qiymət artımı bütün ziyarətçilər üçün vahid giriş haqqının ləğv edilməsini tənqid edən həmkarlar tərəfindən narazılıqla qarşılandı.

Fransa Mədəniyyət naziri Rəşidə Dati bildirib ki, 2026-cı ildən etibarən bütün milli mədəniyyət müəssisələrində fərqli qiymət siyasəti tətbiq ediləcək.

Versal Sarayı da AB xaricindən gələn ziyarətçilər üçün giriş haqqına 3 avro artırmağı düşünür.

Cavid, BakuPost