Məleykə Abbaszadənin təsdiqlədiyi qərar aranı qarışdırdı - Niyə?

Bakupost.az xəbər verir ki, Globalinfo.az-a danışan deputat Razi Nurullayev məsələyə obyektiv yanaşsaq, DİM-in imtahan tarixlərini hansı səbəbdən məhz bu günə təyin etdiyini demək çətindir deyib.

“Ola bilsin ki, əvvəlcədən təsdiqlənmiş qrafik, təşkilati və ya texniki məhdudiyyətlər bu qərara təsir edib. Bununla belə, Azərbaycanda keçirilən belə genişmiqyaslı və mötəbər beynəlxalq tədbir olan WUF13 ilə eyni günə düşməsi istər-istəməz vətəndaşlar üçün əlavə çətinliklər yaratdı. Bu narahatlıq müəyyən mənada anlaşılandır”.

Deputat qeyd edib ki, bu cür böyük tədbirlərin keçirildiyi günlər əvvəlcədən nəzərə alınmalı və imtahan tarixləri həmin dövrə salınmamalıdır:

“Bu yanaşma daha məqsədəuyğundur. Çünki forum günlərində şəhərdə təhlükəsizlik tədbirləri gücləndirilir, hərəkət məhdudiyyətləri tətbiq olunur ki, bu da imtahana gedənlərin vaxtında müəyyən ünvanlara çatmasını çətinləşdirir. Nəticədə əlavə stress və risklər yaranır. Gələcəkdə bu kimi halların qarşısını almaq üçün dövlət qurumları arasında daha sıx koordinasiya ilə planlaşdırmanın aparılması düzgün və vətəndaş yönümlü yanaşma olardı”.

Qeyd edək ki, DİM-in imtahan tarixləri qurumun rəhbəri Məleykə Abbaszadə tərəfindən açıqlanır və təsdiqlənir.