NASA-nın yeni teleskopu kainatın sirlərini araşdıracaq: “Habbl”dan 1000 dəfə sürətli

Bakupost.az xəbər verir ki, teleskop Yer kürəsindən təxminən 1,6 milyon kilometr uzaqlıqda yerləşən L2 Laqranj nöqtəsindən kainatı müşahidə edəcək.

“Habblın anası” kimi tanınan amerikalı astronom Nensi Qreys Romanın adını daşıyan teleskop yüz milyardlarla ulduzu və milyonlarla qalaktikanı xəritələşdirəcək. Layihənin əsas məqsədi qaranlıq maddə və qaranlıq enerjinin sirrlərini araşdırmaq, həmçinin Günəş sistemindən kənarda minlərlə yeni planet aşkar etməkdir.

NASA mütəxəssislərinin sözlərinə görə, Roman teleskopu səmanı Habbl Kosmik Teleskopundan 1000 dəfə daha sürətli taraya biləcək. Onun çəkəcəyi hər bir görüntü Habblın görüntülədiyi sahədən ən azı 100 dəfə böyük ərazini əhatə edəcək.

Teleskopun əsas missiyalarından biri Süd Yolu qalaktikasının sıx mərkəzi bölgəsini öyrənmək olacaq. Bundan əlavə, o, kainatın genişlənmə sürətini ölçmək və milyardlarla işıq ili uzaqlıqda baş vermiş supernova partlayışlarını araşdırmaq üçün genişmiqyaslı müşahidələr aparacaq.

Layihə NASA-nın son illərdə büdcədən aşağı xərc və nəzərdə tutulandan daha tez tamamlanan nadir böyük kosmik proqramlarından biri hesab olunur. İlk elmi görüntülərin isə ilin sonuna doğru yayımlanacağı gözlənilir.