Qalib Azərbaycandan dünyaya sülh və həqiqət mesajının verildiyi tribuna

Şuşa Qlobal Media Forumunda ənənəvi olaraq hər forumda çıxış edən Prezident İlham Əliyev təkcə jurnalistlərin suallarını cavablandırmır, həm də regional və beynəlxalq əhəmiyyətli məsələlərə öz mövqeyini açıqlayır. Dövlət başçısı dünyanın nüfuzlu media qurumlarının nümayəndələrinin bütün suallarını açıq şəkildə cavablandırır, regionda baş verən proseslər barədə birbaşa məlumat verir. Bu format həm şəffaflığın, həm də açıq siyasi dialoqun göstəricisidir. Xarici jurnalistlərin də etiraf etdiyi kimi, belə formatda ünsiyyət beynəlxalq tədbirlərdə nadir hallarda müşahidə olunur. Şuşa artıq yalnız Qələbənin və azadlığın rəmzi deyil. Şuşa qalib Azərbaycanın Qalib Liderinin dünyaya öz sözünü dediyi siyasi kürsüyə çevrilib. Vaxtilə işğal altında olan, Azərbaycan xalqının nisgilinin və ağrısının simvoluna çevrilmiş şəhərdə bu gün dövlət başçısı dünya mediasının nümayəndələri qarşısında Azərbaycanın regional və qlobal proseslərə baxışını açıqlayır.

Azərbaycan lideri budəfəki Forumda regional, eyni zamanda beynəlxalq aləm üçün aktual məsələlərə toxunub və ölkəmizin həmin problemlərə yanaşmasını ortaya qoyub. Prezident İlham Əliyevin çıxışında ən çox diqqət çəkən istiqamətlərdən biri yenə də sülh məsələsi oldu. Dövlət başçısı Azərbaycanın siyasətinin hər zaman əməkdaşlığa, qarşılıqlı etimada və regional sabitliyə xidmət etdiyini xüsusi vurğuladı. Onun sözlərinə görə, Azərbaycan həm özünü narahat edən məsələləri açıq şəkildə gündəmə gətirir, həm də qonşuların narahatlıqlarının aradan qaldırılması istiqamətində konstruktiv mövqe nümayiş etdirir. Bu məqam rəsmi Bakının sülh gündəliyinə necə həssas yanaşdığını bir daha göstərir. Dövlət başçısı bir daha bəyan etdi ki, Cənubi Qafqaz qarşıdurma məkanı deyil, əməkdaşlıq, iqtisadi inteqrasiya və qarşılıqlı etimad regionuna çevrilməlidir. Bu yanaşma Azərbaycanın həyata keçirdiyi xarici siyasətin ardıcıl və prinsipial xarakter daşıdığını bir daha nümayiş etdirir. Dövlət başçısının dilindən beynəlxalq ictimaiyyətə verilən digər mühüm mesaj Azərbaycanın müstəqil qərarlar qəbul edən, milli maraqlarını qətiyyətlə müdafiə edən və eyni zamanda qlobal əməkdaşlığa açıq dövlət olması ilə bağlı idi. Enerji təhlükəsizliyi, nəqliyyat dəhlizləri, yaşıl enerji, rəqəmsal transformasiya və humanitar əməkdaşlıq sahələrində Azərbaycanın irəli sürdüyü təşəbbüslər ölkənin beynəlxalq nüfuzunu daha da gücləndirir.

Bir sözlə, Şuşa Qlobal Media Forumu təkcə jurnalistlərin peşəkar müzakirə platforması deyil, həm də Azərbaycanın həqiqətlərini beynəlxalq informasiya məkanına birbaşa çatdıran mühüm diplomatik tribuna oldu. Buradan verilən mesajlar göstərdi ki, həqiqətin ən güclü müdafiəçisi obyektiv media, etimadın ən möhkəm təminatçısı isə şəffaf dialoqdur. Azərbaycan da məhz bu prinsiplər əsasında beynəlxalq əməkdaşlığın genişlənməsinə və regionda dayanıqlı sülhün möhkəmlənməsinə öz töhfəsini verməyə davam edir.