Rusiyada seçkilər: Cəmiyyət müharibənin davamına səs verdi

“Vahid Rusiya”nın namizədləri 225 təkmandatlı dairələrin 208-də də liderdir.

İlkin nəticələr onu göstərir ki, “Vahid Rusiya” Dumada konstitusiya çoxluğuna sahib ola bilər. Bunun üçün partiyaya 450 mandatlıq Dumada 301 yerə sahib olmaq kifayətdir.

“Atlas” Araşdırmalar Mərkəzinin rəhbəri Elxan Şahinoğlu “Bakupost”a bildirib ki, Rusiyadakı seçkilərdə gözlənilən nəticələr əldə olunub:

“Hakim partiya yenə də parlamentdə böyük səs çoxluğuna malik olacaq. Müxalif olan “Yabloko” Partiyası isə seçkilərdən kənarlaşdırıldı. Onlar sülh və müharibənin dayandırılması tərəfdarı kimi çıxış edirdilər. Bu kimi açıqlamalar isə Kremlin xoşuna gəlmədiyindən, “Yabloko” seçkidən kənarda saxlanıldı. Belədə, Dumada müharibənin dayandırılmasını istəyən hansısa bir qüvvə yer almadı. Kremlə də bu lazım idi. Dəyişən bir şey yoxdur. Bu isə o deməkdir ki, Rusiya insanlarının əksəriyyəti hələ də Kremlin müharibə ideologiyasını dəstəkləyir”.

Ekspert qeyd edir ki, seçkilərdən sonra Rusiyanın Ukrayna və Qərbə münasibətdə aqressivliyi artmasa da, əvvəlki səviyyədə davam edəcək:

“Mövcud siyasət dəyişmədən davam edəcək”.