SEPAH sərhəddə xəbərdarlıqsız atəş əmri verdi

Bakupost.az Musavat.com-a istinadən xəbər verir ki, İran mətbuatı və regional mənbələrin yaydığı məlumata görə, hazırda sərhəd zonasında istənilən növ hərəkət qəti şəkildə qadağan olunub və hərbçilərə ən kiçik şübhə yarandığı təqdirdə xəbərdarlıq etmədən birbaşa atəş açmaq (atəşlə məhv etmək) əmri verilib.

Məlumata görə, SEPAH-ın bir hissəsi və İranın sərhəd qoşunları əvvəlki mövqelərini tərk edərək yaşayış məntəqələrinə və ətrafdakı strateji yüksəkliklərə yenidən yerləşdirilib. Bu qəfil dislokasiya və sərt əmrlər bölgədə gərginliyin pik həddə çatdığını, eyni zamanda rejimin mümkün daxili iğtişaşlar və ya xarici kəşfiyyat qruplarının sızması qorxusu ilə hərəkət etdiyini göstərir.

Xüsusilə Müctəba Xameneinin ABŞ-ın atəşkəs təklifini rədd etməsindən sonra sərhədlərin bu cür qapadılması və hərbçilərə "vur" əmrinin verilməsi İranın həm daxili, həm də xarici təhlükələrə qarşı ən radikal müdafiə rejiminə keçdiyinin sübutudur.

Analitiklər hesab edirlər ki, hərbi vəziyyətin elan olunması həm də orduda artan fərarilik hallarının qarşısını almaq və sərhəd boyu nəzarəti SEPAH-ın tam diktəsi altına salmaq məqsədi daşıyır.