Türkiyə kosmos yarışında: Qardaş ölkə Aya çıxmağa hazırlaşır

“Bakupost” xəbər verir ki, bu barədə Türkiyənin sənaye və texnologiya naziri Mehmet Fatih Kacır açıqlama verib.

Nazirin sözlərinə görə, Ay Tədqiqat Proqramı çərçivəsində Türkiyədə layihələndirilən və istehsal edilən kosmik aparatın Aya göndərilməsi planlaşdırılır. O qeyd edib ki, bu təşəbbüs ölkənin kosmos proqramında yeni mərhələnin başlanğıcı olacaq.

Kacır həmçinin Ankarada kosmik texnologiyalar parkının yaradılması istiqamətində işlərin davam etdiyini bildirib. Onun sözlərinə görə, Türkiyə yalnız kosmosa müstəqil çıxış imkanlarını gücləndirməyi deyil, həm də beynəlxalq buraxılış mərkəzi kimi fəaliyyət göstərəcək kosmodrom yaratmağı hədəfləyir.

Nazir əlavə edib ki, ölkədə peyk texnologiyaları və kosmik tədqiqatlar sahəsində həyata keçirilən layihələr davam etdirilir və bu istiqamətdə yeni texnologiyaların inkişafına xüsusi önəm verilir.