Xankəndi-Ağdam yolu niyə bağlıdır? – AAYDA-dan açıqlama

Xankəndi-Ağdam yoluna hər iki istiqamətində beton plitələr qoyulub. Yolun bəzi hallarda müvəqqəti açıldığı, sonradan yenə bağlanıldığı qeyd olunur. Belə olan halda Ağdamdan Xankəndi və əksinə hərəkət edən şəxslər yararsız yoldan istifadə etmək məcburiyyətində qalırlar.

Bakupost.az xəbər verir ki, məsələ ilə bağlı Avtomobil Yolları Dövlət Agentliyindən (AAYDA) “Teleqraf”ın sorğusuna cavab olaraq bildirilib ki, Xankəndi-Ağdam asfalt yolu hələ sürücülərin istifadəsinə verilə bilməz:

Qurumun mətbuat xidmətinin rəhbəri Anar Nəcəflinin sözlərinə görə, yolda işlər hələ davam edir, nişanlar quraşdırılmayıb, yol xətləri çəkilməyib. Bu işlər icra olunmamış yol açıla bilməz:

“İnsanlar daha qısa yolla mənzil başına çatmaq istəyirlər, amma orada təhlükəsizlik tədbirləri görülməlidir. Əyri xəttin dəmir tilləri quraşdırılması, yol kənarında, yol ayrıcında, yol nişanlarının quraşdırılması, üfüqi nişanlama xətlərinin çəkilməsi yəni, bu proses tam yekunlaşandan sonra sürücülərin istifadəsinə verilməsi mümkündür. Təhlükəsizlik tədbirləri görülmədən orada necə gəldi yolu açıb istifadəyə vermək düzgün və mümkün deyil”.

O əlavə edib ki, ərazidə işlər yekunlaşmadığı üçün texnikalar da fəaliyyət göstərir və yol açıq olsa belə, texnikaların hərəkəti təhlükəsizlik baxımından düzgün deyil.