Yük avtomobillərinin özbaşınalığı – Sürücülər xüsusi icazələrdən sui-istifadə edir

Bu kimi hadisələrdən biri də bu gün paytaxtın Heydər Əliyev prospektində baş verib. Yayılan görüntülərdən yük avtomobilinin yol hərəkəti qaydalarını kobud şəkildə pozmasının ağır qəzaya səbəb olduğu aydın olur.

Mövzu ilə bağlı Bakupost.az-a danışan nəqliyyat eksperti Raqif Raufoğlu bildirib ki, yük avtomobillərinin, xüsusilə də ağır tonnajlı maşınların idarə olunmasında ciddi problemlər mövcuddur:

“Belə qəzalar kifayət qədər çoxalıb. Yük maşınlarının, daha çox da ağır tonnajlı maşınların necə gəldi idarə olunmasının şahidi oluruq. Hərçənd ki, onların ümumiyyətlə bəlli saatlarda mərkəzdə hərəkət etmələri qadağandır. Amma indi müəyyən layihələrə görə bəzi yük maşınlarına xüsusi icazələr verilir. Lakin bundan sui-istifadə edirlər. Hətta bir çox maşınların üstündən palçıq tökülür. Halbuki onlar obyektdən çıxanda təmizlənməli, yuyulmalıdır. Çox heyif ki, bunlara da əməl etmirlər, həm yol pis günə qalır, həm də kifayət qədər təhlükəli vəziyyət yaradırlar. Təəssüf ki, bunların azaldığını müşahidə etmirik. Düşünürəm, bu kimi hallarla bağlı yol polisinin nəzarəti güclənsə, nəticə görəcəyik”.