Sabir Rüstəmxanlının "Seçilmiş əsərləri" təqdim olundu - FOTO+VİDEO

Bakupost.az xəbər verir ki, Azərbaycan Milli Elmlər Akademiyasının Elmi Kitabxanasında baş tutan tədbirdə bir sıra ictimai-siyasi xadimlər, tanınmış alimlər, millət vəkilləri, yazıçı və jurnalistlər iştirak edib.

Təqdimat mərasimini giriş sözü ilə açan Azərbaycan Milli Elmlər Akademiyasının prezidenti İsa Həbibbəyli bildirib ki, Sabir Rüstəmxanlının yaradıcılığı Azərbaycanın milli varlığına, milli müstəqilliyinin yaranmasına, inkişafına və möhkəmlənməsinə xidmət edir:

Biz Sabiri həm ədəbiyyatşünas, həm də elm xadimi kimi tanıyırıq. 15 cilddən biri onun elmi fəaliyyətinə həsr olunub. Əsərlərinin 15 cildinin 14 cildinə Azərbaycanın tanınmış və müxtəlif nəsillərdən olan alimləri, ictimai fikir nümayəndələri ön söz yazıblar. Sabir Rüstəmxanlının 15 cildliyi onun Azərbaycan ədəbiyyatındakı böyük yerini göstərir. Bu, ilk 15 cildliklərdən biri kimi nümunədir. Hələ ki, bizim yazıçı və şairlərimizin 15 cildlik əsəri mənə məlum deyil. Bu 15 cild onun yaradıcılığının hamısını əhatə etmir. Sabir Rüstəmxanlının yaradıcılığına bələd olan bir adam kimi tam məsuliyyətlə deyə bilərəm ki, onun ən azı 10 cild də çap olunmamış əsərləri var. Sabir Rüstəmxanlı həm ictimai fəaliyyət, həm ədəbiyyat meydanında bir parlaq Azərbaycan vətəndaşı, görkəmli ziyalı, qüdrətli bir Azərbaycan ədibi kimi sözünü deməkdə davam edir."

Azərbaycan Yazıçılar Birliyinin sədri Anar Rzayev isə çıxışında Sabir Rüstəmxanlının həm poeziyası, həm publisistikası, həm də ictimai fəaliyyətini yüksək qiymətləndirdiyini vurğulayıb:

Sabir həm də etibarlı dostdur. Yazıçılar Birliyinə haqsız hücumlar olanda, bizi müdafiə edən, haqq səsimizə hay verən insanlardan biri Sabir idi. Arzu edirəm ki, əziz dostumun yaradıcılığı 30 cildə qədər olsun, 30 cildliyinin təqdimatına gələk."

Milli Məclisin deputatı, akademik Nizami Cəfərov bildirib ki, Sabir Rüstəmxanlının ictimai, ədəbi və məişət həyatı hər birimizin tərcümeyi-halıdır:

"İctimai məzmunu olmayan ədəbiyyat, nə qədər estetik olsa da, bir müddətdən sonra o qədər də dəyərli olmur. Bu mənada Sabir Rüstəmxanlı düşüncələri dəyərli olan adamdır, cəmiyyətin ruhunu bilən və onu hər dəfə özü və başqaları üçün müzakirəyə çıxartmağa cəsarət tapan adamdır. Sabir müəllimlə hər mövzunu müzakirə etmək olur.

Milli Məclis sədrinin müavini, akademik Rafael Hüseynov qeyd edib ki, Sabir Rüstəmxanlının kitablarının hamısını "Azərbaycannamə" adlandırmaq olar:

"İndi çoxlu cildlərin yazılması və onların təqdimat mərasimlərinin keçirilməsi ənənə halını alıb. Ancaq hansı cildlər yazılır, hansı cildlərin bayramı keçirilir – bu, ayrı bir məsələdir. Bu gün Azərbaycan yazıçısı, Azərbaycan alimi, Azərbaycan ziyalısı Sabir Rüstəmxanlının 15 cildlik silsiləsinin təqdimatı, düşünürəm ki, gördüyümüz digər kitab təqdimatlarına və görəcəklərimizə əlbəttə ki, bənzəmir.

Bu, Azərbaycanın mənəvi həyatında son dərəcə əlamətdar bir hadisədir. Çünki bu kitablar bütövlükdə Azərbaycan haqqında bir kitabdır. Bunu da səbəbsiz demirəm. Sabir Rüstəmxanlı haqqında dissertasiya, tədqiqat əsərləri yazılıb, bəlkə yüzlərlə məqalə var, bundan sonra da yazılacaq.

Azərbaycan Yazıçılar Birliyinin birinci katibi, Xalq yazıçısı Çingiz Abdullayev Sabir Rüstəmxanlının 80-ci illərin sonunda başlayan Milli Azadlıq Hərakatında oynadığı roldan, Azərbaycanın yenidən öz istiqlalına qovuşmasındakı xidmətlərindən danışıb:

Daha sonra Xalq şairi Sabir Rüstəmxanlı çıxış edərək öz ictimai-siyasi fəaliyyətindən danışıb. O qeyd edib ki, bu tədbirə kitab təqdimatı kimi deyil, hesabat tıdbiri kimi baxır:

"Mən bu günkü təqdimata hesabat kimi baxıram. Həqiqətən də yazılarımın bir hissəsi kənardadır, qeydlərimdədir. Milli Məclisdəki çıxışlarımı yığıb-yığışdırmaq mümkün deyil, xatirələr, gündəliklər və s. Yazı çoxdur, amma mən çoxluqla öyünmək istəmirəm. Bu kitabların heç birində milli ideallarımıza, Vətən yoluna, xalq yoluna ziyan vura biləcək bir cümlə belə yoxdur.

Mənim ilk şeirim rayon qəzetində çap olunmuşdu - "Kənd yolu". O kənd yolundan başladı bütün həyatımız. Sonra gəldik Bakıya, amma təəssüf ki, Bakı bizi yad qarşıladı. 18 yaşımdan Bakı haqqında şeirlər yazırdım. Onların ruhu təxminən eynidir:

Məni yaman yad gözlərlə seyr edirsən,

Yad dil ilə dindirirsən məni, Bakı.

Tariximin əlçatmayan qanadından,

Bu günümə endirirsən məni, Bakı.