“Bu, orduda rəqəmsal bacrıqların inkişafına ən yaxşı töhfədir” - Deputat

Müdafiə Nazirliyindən bildirilib ki, təhsildə fərqlənən istedadlı gənclərin bilik və bacarıqlarından daha səmərəli faydalanmaq, eyni zamanda onların karyera inkişafına töhfə vermək məqsədilə Müdafiə Nazirliyində hərbi xidmətkeçmə ilə bağlı yeni konsepsiya tətbiq edilir.

Yeni təlim-təcrübə konsepsiyasına əsasən, hərbi xidmətdə olan yüksək intellektə malik istedadlı çağırışçılar gənc əsgərlərin hazırlığı proqramını başa çatdırdıqdan sonra öz ixtisaslarına uyğun müxtəlif layihələrə və fəaliyyətlərə cəlb olunmaları məqsədilə hərbi xidmətlərini Milli Müdafiə Universitetinin tərkibində yaradılmış bölmələrdə xüsusi şəraitdə davam etdirəcəklər.

Məsələyə münasibət bildirən millət vəkili Arzu Nağıyev Bakupost.az -a deyib ki, Milli Müdafiə Universitetinin tərkibində intellektual qabiliyyətli yeni bölmələrin yaradılması Azərbaycan Müdafiə sisteminin inkişafında yeni bir dövrün başlanğıcıdır. Ölkədə və xaricdə İT ixtisasını uğurla başa vuran çağırışçılar Milli Müdafiə Universitetinin tərkibində əsgərliklərini xüsusi şəraitdə çəkəcəklər:

"Bu gün artıq dövr texnologiya dövrüdür və bəşəriyyət öz inkişafının zirvəsindədir. Dolayısı ilə bu inkişaf hərbi sahədə də özünü göstərir. Bu gün dünyada gedən hibrid müharibələrin özülündə texnoloji biliklərin savaşı durur. Bu baxımdan ordu quruculuğunda aparılan islahatlar çərçivəsində Azərbaycan Ordusunda intellektual qabiliyyətli bölmələrin yaradılmasını ordumuz və dövlətimiz adına təqdirəlayiq addım hesab edirəm. İstedadlı gənclərin arxa cəbhədə dövlətin müdafiə beynini formalaşdırması ön cəbhədə özünü müsbət anlamda göstərəcək. Bu, həm də Azərbaycan gəncinin öz potensialını kəşf etməsi, təcrübə toplaması, orduda rəqəmsal bacarıqların inkişafına veriləcək ən yaxşı töhfədir”.