Rusiya təyyarə və körpülərin qisasını necə alacaq? - AÇIQLAMA

Məsələ ilə bağlı Bakupost.az -a danışan hərbi ekspert Ədalət Verdiyev Ukraynanın Krım körpüsünə endirdiyi zərbələrin müharibə qayda-qanunlarına tamamilə uyğun olduğunu bildirib:

“Ukrayna son günlərdə Rusiyaya qarşı kifayət qədər uğurlu əməliyyatlar həyata keçirir. Bildiyiniz kimi, bir neçə gün əvvəl Rusiyanın 4 hərbi aerodromuna zərbələr endirən Ukrayna, 40-dan çox strateji aviasiya vasitəsinə ziyan vurdu. Digər tərəfdən, Krım körpüsünün növbəti dəfə partladılması, birmənalı şəkildə Ukraynanın Rusiyaya qarşı onun ərazisində və nəzarətində olan ərazilərdə əməliyyat imkanlarını genişləndirməsindən xəbər verir. Krım körpüsü mülki obyekt olsa da, Rusiya ondan öz hərbi qüvvələrini texnika və qida ilə təmin etmək üçün logistik infrastruktur kimi istifadə edir. Başqa sözlə, bu körpü Rusiya tərəfindən Ukraynaya qarşı hərbi əməliyyatlarda istifadə olunur. Körpünün bir hissəsi sıradan çıxarılıb və onun istifadəsi müvəqqəti olaraq dayandırılıb.”

Ə.Verdiyevin fikrincə, körpünün partladılması, Ukraynanın cənubunda gedən döyüş əməliyyatlarına birbaşa təsir edə bilər:

“Çünki bu əraziyə zərbələr əsasən, Krım yarımadasından endirilir, orada yerləşən Rusiya qoşunlarının təchizatı isə məhz Krım körpüsü vasitəsilə həyata keçirilirdi. Amma bu hücumlar nəticəsində Rusiyanın geri addım atacağı gözlənilən deyil. Əksinə, Rusiya nüvə silahı istisna olmaqla, imkanında olan bütün silah sistemlərindən - pilotsuz vasitələrdən, hipersəs və ballistik raketlərdən istifadə etməklə Ukraynanın böyük şəhər və vilayət mərkəzlərinə zərbələrini intensivləşdirəcək. Hətta Ukraynanın paytaxtı Kiyev şəhəri də zərbələrə məruz qala bilər. İstənilən halda Rusiya-Ukrayna münaqişəsi yeni bir fazaya qədəm qoyub. Bu, iki ölkə arasında davam edən danışıqlarda müsbət nəticənin əldə olunmasını müəyyən mənada ləngidəcək.”