"Bayrağımızdakı rəmzi ərəblərə, yəhudilərə bağlayırlar" - Sabir Rüstəmxanlı söhbətləri- VİDEO

Verilişin müəllifi, Xalq şairi Sabir Rüstəmxanlı bildirib ki, son günlər sosial şəbəkələrdə səkkizguşəli ulduzun mənası axtarılır, bir çoxları bununla bağlı müxtəlif fikirlər səsləndirirlər. Onun sözlərinə görə, bəzən dövlət rəmzlərinin mənası ilə bağlı yanlış mülahizələrə yol verilir, ağlasığmaz versiyalar irəli sürürlər:

“Görünür, bir-birimizi az oxuyuruq. Mən 22 il əvvəl – 2003-cü ildə “Səkkizguşəli ulduz və Tanrıya gedən yol” adlı məqalə yazmışdım və orada bayrağımızdakı səkkizguşəli ulduzun mənasını izah etmişdim. İndi baxıram bu mövzuya yenidən qayıdırıq.”

S.Rüstəmxanlı səkkizguşəli ulduzun ərəb əlifbası ilə əlaqələndirilməsinə qarşı çıxıb. Bildirib ki, ingilis tarixçı Devid Rohl “Sivilizasiyaların başlanğıcı” kitabında bu mövzuya toxunub:

“O, "Bibliya" əsasında insanın ilk yaşadığı yeri axtara-axtara dünyanı gəzib. Çox maraqlıdır ki, axtardığını Savalanın ətəyində tapıb. Sonda ümumiləşdirmə aparıb ki, insanların ilk beşiyi Ağrı dağı ilə Savalan dağının arasıdır - hər halda Azərbaycan ərazisidir. O, əsərdə köhnə rəmzlərdən də danışır. Yazır ki, qədim şumerlərdə səkkizguşəli ulduz Tengri (Tanrı) işarəsidir.”

Sabir Rüstəmxanlı bildirib ki, bir dəfə Saatlıdan olan sürrealist rəssam Sürəyya Zeynalova da onunla söhbətində bu versiyanı irəli sürüb:

“Saatlı muzeyində Sürəyya xanım mənə 2 xalça göstərdi. Onlardan biri alban, digəri isə Muğan xalçası idi. Həmin Muğan xalçasının mərkəzində səkkiz guşəli ulduz var idi. Sürəyya xanım dedi ki, bu yaradan simvoludur, Tanrı ruhudur.”