Bu, Putini Ukrayna ilə bağlı ən pis ssenariyə məcbur edir - Sabiq baş nazir

Rusiya Ukrayna münaqişəsində Putinin maksimalist tələblərini yerinə yetirə bilmir.

"Bakupost" xəbər verir ki, bunu İsveçin keçmiş Baş naziri və xarici işlər naziri Karl Bildt "Kyiv Independent" qəzetindəki köşəsində bildirib.

Onun sözlərinə görə, Vladimir Putin hazırkı vəziyyətdə ən yaxşı seçim olan Ukraynada mövcud təmas xətti boyunca atəşkəsə razılaşmalıdır:

"Onun bütün Donbası ələ keçirmək, hətta bütün Ukraynanı tabe etmək kimi israrlı səyləri müharibədə tamamilə məğlubiyyətə səbəb ola bilər. Əgər Rusiya Prezidenti Vladimir Putin Ukrayna ilə müharibəsinin gedişatını ayıqlıqla qiymətləndirsəydi, atəşkəs istəyərdi. Lakin onun mühakiməsi açıq-aydın bulanıqdır, çünki bütün əlamətlər onun müəyyən bir eskalasiya axtardığını göstərir. Əgər o, bu yolu seçərsə, vəziyyəti hamı üçün, amma ən əsası özü üçün daha da pisləşdirəcək".

Bildt qeyd edib ki, 2025-ci ilin avqust ayında Ankoricdə ABŞ Prezidenti Donald Trampla görüş zamanı Putin Vaşinqtonu Ukrayna prezidenti Volodimir Zelenskiyə təzyiq göstərməyə və onu təkcə Rusiyanın artıq işğal etdiyi əraziləri tanımağa razı salmağa deyil, həm də Donbasın Ukrayna Silahlı Qüvvələrinin nəzarətində olan hissəsini təhvil verməyə məcbur etməyə inandırmağa çalışıb:

"Ukraynanı bu güzəştlərə getməyə məcbur etmək mümkün olmadığı üçün danışıqlar dalana dirənib və indi Kreml öz məqsədlərinə hərbi yolla çatmağa ümid edir. Putin inanır ki, mülki əhaliyə və vacib infrastruktura hücumlar Ukraynanı təslim olmağa məcbur edə bilər. Lakin o, şübhəsiz ki, böyük ağrılar versə də, təkcə hava bombardmanı heç vaxt müharibədə qalib gəlməyib və bu, Ukraynada dəyişməyəcək. Rusiya ordusu cəbhə xəttində ilişib qalıb və son dərəcə yavaş irəliləyir. Bu arada, Ukrayna Rusiya ərazisinin dərinliklərinə hücumlarını gücləndirir və təcavüzkarın özünə ciddi ziyan vurur.

Müəllif işğal olunmuş Krımda Rusiya hərbi logistikası və infrastrukturuna Ukrayna hücumlarına xüsusi diqqət yetirir:

"Putin üçün əsas simvolik əhəmiyyətə malik olanın Donbas deyil, Krımdır. 2014-cü ildə yarımadanın ilhaqı Putinin ölkə daxilində populyarlığını kəskin şəkildə artırdı və nəticədə 2022-ci ildə tammiqyaslı işğala yol açdı. İşğalın ilkin məqsədi - bütün Ukraynanı hərbi və siyasi cəhətdən tabe etmək - artıq mümkün deyil. Kreml üçün rasional həll indi atəşkəsə razılaşmaq olacaq. Əgər o, hazırkı yolu ilə davam edərsə, istədiyi Donetsk vilayətinin kiçik bir hissəsini əldə etməsi ehtimalı aşağı, Krım üzərində nəzarəti itirməsi ehtimalı isə çox yüksəkdir".

Asena,

BakuPost