12:13 / 15 Noyabr 2021

Məktəblərə istiliyin verilməsinə başlanıldı

576

Bu gündən etibarən paytaxt məktəblərinə istiliyin verilməsinə başlanılıb.

Bakı Şəhəri üzrə Təhsil İdarəsindən Bakupost.az -a verilən məlumata görə, Nazirlər Kabinetinin müvafiq qərarına uyğun olaraq, məktəblərə istiliyin verilməsi hər il ənənəvi olaraq noyabrın 15-dən başlayır və aprelin 15-dək davam edir.
Məlumatda bildirilib ki, bu istiqamətdə öncədən 2021-2022-ci tədris ilində payız-qış mövsümünə hazırlığın yoxlanılması məqsədilə monitorinqlər aparılıb. Monitorinq zamanı qazanxanalar, istilik xətləri, radiatorlar yoxlamadan keçirilib və aşkarlanmış nöqsanların aradan qaldırılması üçün operativ tədbirlər görülüb.

Sıradan çıxmış radiatorların, dövriyyə nasoslarının dəyişdirilməsinə, istilik xətlərinin yenilənməsinə və bəzi məktəblərin qazanxanalarında qazın təzyiqinin artırılmasına olan ehtiyaclar ümumiləşdirilərək bu barədə müvafiq qaydada müraciət olunub və təxirəsalınmaz tədbirlər həyata keçirilib.

Bundan əlavə, məktəblərin tüstü borularında müvafiq qurumlarla birlikdə təmizlik işləri, həmçinin qapı pəncərələrin zəruri təmiri yerinə yetirilib. Təhlükəsizlik tədbirlərinin gücləndirilməsi məqsədilə məktəblərdə çalışan ocaqçılar da mütəmadi olaraq təlimlərdə iştirak edirlər.

Monitorinqlər zamanı təhsil müəssisələrinin istilik sistemlərindəki müəyyən edilmiş problemlərin aradan qaldırılması istiqamətində görülmüş işlərlə yanaşı, cari problemlərin aradan qaldırılması da diqqət mərkəzində saxlanılır. Mövsüm ərzində hər hansı problem yaranarsa, onlar da operativ həll olunur", - idarədən bildirilib.

Qeyd edək ki, BŞTİ-nin tabeliyində fəaliyyət göstərən ümumi təhsil müəssisələrindən 133-ü “Azəristilik” ASC tərəfindən mərkəzləşdirilmiş qaydada, 179-u fərdi qazanxana vasitəsilə, 7-si isə fərdi və mərkəzləşdirilmiş qaydada istiliklə təchiz edilib.

Sevinc
BakuPost
Bizi telegram-da izləyin
Bizi facebook-da izləyin
Bizi youtube-da izləyin

Şərhlər
Son xəbərlər
Çox oxunanlar
Son xəbərlər