Rusiya “Sarmat”ı yoxladı, Putin “dünyanın ən güclüsüdür” dedi

Bakupost.az yerli mediaya istinadən xəbər verir ki, görüş zamanı Karakayev “Sarmat” qitələrarası ballistik raketinin sınaq buraxılışının uğurla başa çatdığını bildirib.

Putin raket sınağını yüksək qiymətləndirərək “Sarmat”ı “dünyanın ən güclü raket sistemi” adlandırıb. Onun sözlərinə görə, raketin döyüş başlığı Qərb raketlərindən dörd dəfə güclüdür.

Rusiya lideri bildirib ki, “Sarmat” yalnız ballistik deyil, həm də suborbital kosmik uçuş imkanına malikdir. Putin raketin 35 min kilometrdən artıq uçuş məsafəsinə sahib olduğunu, yüksək dəqiqliklə hədəfləri vurduğunu və mövcud, eləcə də gələcək raketdən müdafiə sistemlərini aşa bildiyini deyib.

Putin əlavə edib ki, “Sarmat” raket sistemi ilin sonuna qədər döyüş növbətçiliyinə başlayacaq və Rusiyanın strateji nüvə qüvvələrinin imkanlarını gücləndirəcək.

Rusiya prezidenti həmçinin hipersəsli orta mənzilli “Oreşnik” ballistik raketinə də toxunub. O bildirib ki, bu raketin 2025-ci ildə ordunun arsenalına daxil edilməsi planlaşdırılır və onun nüvə başlıqları daşımaq qabiliyyəti var.

Rusiya Müdafiə Nazirliyi “Sarmat” raketinin sınaq buraxılışına aid görüntüləri də yayımlayıb.