Təbrizdə komendant saatı – İranda hərbi vəziyyət elan olundu

Güney Təbriz şəhərində faktiki olaraq hərbi vəziyyət elan olunub, komendant saatı tətbiq edilib.

Bakupost.az xarici KİV-ə istinadən xəbər verir ki, əhaliyə axşam saat 20:00-dan sonra küçəyə çıxmamaq barədə xəbərdarlıq edilib.

Yayılan hesabatlara görə, Təbrizin Böyük Bazarı və böyük ərzaq mağazaları bağlanıb, bəzi kiçik ticarət obyektləri isə müəyyən saatlarda məhdud şəkildə fəaliyyət göstərir. Bu, ölkədəki genişmiqyaslı etiraz aksiyaları və iqtisadi böhran fonunda tətbiq olunan sərt təhlükəsizlik tədbirlərinin bir hissəsidir.

Rialın kəskin devalvasiyası və bahalaşma ilə başlayan narazılıqlar ölkə boyunca geniş etirazlara səbəb olub. Təbrizdə tətbiq olunan sərt rejim çərçivəsində təhlükəsizlik qüvvələrinin odlu silahdan istifadə etdiyi və ciddi nəzarət tədbirləri gördüyü bildirilir, vətəndaşların gündəlik yaşama çıxışı əhəmiyyətli dərəcədə məhdudlaşıb.

Vəziyyətlə bağlı tətbiq olunan internet blokadası səbəbindən ölkədən məlumat axını məhdudlaşıb.

Bu yeni tədbirlər İran daxilindəki gərginliyin daha da artdığını və hakimiyyətin etirazları yatırmaq üçün sərt hərbi və təhlükəsizlik üsullarına əl atdığını göstərir.

Cavid, BakuPost