Sərdar Cəlaloğlu: “Kişiylə qadın bərabər olsaydı...”

"Madərşahləğa baxsaq, görərik ki, tarix qadınların aparıcılığı ilə yaranıb, ardıyca ağır, fiziki əmək fəaliyyəti meydana çıxandan sonra kişilər yavaş-yavaş hakim mövqe tutublar və padərşahlıq yaranıb. Padərşahlıq kişilərin üstünlüyünü nəzərə alan bir mədəniyyətdir. Antik dövrdə Aristotel qadınları insan hesab etmirdi. Yəni bir çox dinlərdə də qadınları günahkar kimi tanıyırdılar. Bütün bunlar hamısı ona gətirib çıxarır ki, qadınlar kişilərə nisbətən ictimai-siyasi həyatdan sıxışdırılıb çıxarılır.

Digər tərəfdən ,qadın psixologiyasıyla kişi psixologiyası, xarakteri fərqlidir. Onlar arasında antropoloji cəhətdən də kəskin fərqlər var. Kişilər ekstensiv, qadınlar isə intensivdir. Yəni qadınlar daxilə, qapalı yerlərə meyillidi, kişilər isə açıq xarakterlidir, xaricə nəzarət etməyə meyl edən psixogiyaya malikdir. Bu da kişilərin ictimailəşməyə daha çox meyl etməsinin səbəblərindən biridir".

"Amma təbii qeyri-bərabərlik də var. Müasir dövrdə bu bərabərliklərin aradan qaldırılmasıyla bağlı müəyyən süni metodlardan istifadə olunur. Qadınlara zəif yox, zərif demək olar. Çünki Tarixdə Tomris kimi dəmir qadınlar olub. Bütünlükdə bir şeyi etiraf etməliyik ki, təbiət qadın və kişini fərqli yaradıb. Bu fərqlilik onların imkanlarında yaranır. Cəmiyyət elə qərarlar verməlidir ki, həmin təbii qeyri-bərabərlik süni qeyri-bərabərliyə və yaxud sosial qeyri-bərabərliyə səbəb olmasın. Bu qeyri-bərabərlik isə gözəllikdir, təbiətin naqisliyi deyil. Kişi və qadın tam bərabər olsaydı, həyat bu qədər maraqlı olmazdı".