Dünya parçalanır, Bakı birləşdirir – Qlobal Forumun siyasi çəkisi

“Keçid dövründə olan dünyada fikir ayrılıqlarının aradan qaldırılması” mövzusuna həsr olunan Forum çərçivəsində keçirilən panel müzakirələrində qlobal təhlükəsizlik, dünyada dəyişən güc balansı, beynəlxalq hüquqa hörmət, yeni çağırışlar və çoxtərəfli əməkdaşlığın gələcəyi kimi mühüm məsələlər müzakirə olundu.

Hər il olduğu kimi, bu il də Forumda yüksək iştirakçılıq nümayiş olunur. 2013-cü ildən etibarən keçirilən Qlobal Bakı Forumu dünyanın müxtəlif ölkələrindən siyasi liderləri, sabiq prezident və baş nazirləri, beynəlxalq təşkilatların nümayəndələrini və ekspertləri bir araya gətirən nüfuzlu bir platforma kimi tanınır.

Prezident İlham Əliyev çıxışında forumun əhəmiyyətini xüsusi qeyd edərək bildirdi ki, Qlobal Bakı Forumu çox nüfuzlu beynəlxalq tədbirdir və əsas beynəlxalq forumlarla eyni səviyyədə dayanır. Dövlət başçısının sözlərinə görə, müasir dövrdə dünyada baş verən siyasi və iqtisadi proseslər beynəlxalq əməkdaşlığın və dialoqun daha da gücləndirilməsini zəruri edir. Bu baxımdan Qlobal Bakı Forumu fikir mübadiləsi aparılması və müxtəlif məsələlər üzrə ortaq yanaşmaların formalaşdırılması üçün mühüm platforma rolunu oynayır.

Mövzu ilə bağlı Milli Məclisin deputatı Pərvanə Vəliyeva Bakupost.az -a açıqlamasında bildirib ki, Forum müasir dünyanın mürəkkəb geosiyasi vəziyyətinin müzakirə olunduğu mühüm platformaya çevrilib:

P.Vəliyeva qeyd etdi ki, bu platforma dünya mediasının da diqqət mərkəzindədir:

“Azərbaycanın dünyada baş verən yeni geosiyasi yerdəyişmələr və yeni çağırışlar barədə, həmçinin Cənubi Qafqaz regionunda normallaşma ilə bağlı mövqeyini təqdim etməyə imkan yaradır. Burada beynəlxalq proseslərə Azərbaycanın baxışı, xarici siyasətinin istiqamətləri, regionda baş verən hadisələr və ölkəmizlə bağlı bir çox məsələlər müzakirə olunur. Dövlət başçımızın fikirləri ilə bütün dünya ictimaiyyəti və mediası bu məsələlərə dair geniş məlumat əldə edə bilib”.

Millət vəkili Məşhur Məmmədov isə bildirdi ki, son illərdə müxtəlif regionlarda yeni münaqişə ocaqlarının yaranması və mövcud qarşıdurmaların dərinləşməsi beynəlxalq hüququn və qlobal təhlükəsizlik sisteminin səmərəliliyi ilə bağlı ciddi suallar doğurur. Onun sözlərinə görə, bu kontekstdə dövlətlərin öz təhlükəsizlik strategiyalarını daha real və praqmatik yanaşmalar əsasında qurması zərurətə çevrilir:

Deputat əlavə edib ki, Prezident İlham Əliyevin çıxışında toxunduğu digər mühüm istiqamət qlobal nəqliyyat və logistika sistemində Azərbaycanın roludur:

“Son illər ölkədə nəqliyyat infrastrukturu sahəsində həyata keçirilən iri layihələr Azərbaycanın Avrasiya məkanında mühüm tranzit qovşağına çevrilməsinə səbəb olub. Bu baxımdan Azərbaycan həm Orta Dəhliz, həm də Şimal-Cənub Nəqliyyat Dəhlizi üzrə əsas iştirakçı dövlətlərdən biridir. Bu marşrutlar Avropa ilə Asiya arasında ticarət və logistika əlaqələrinin diversifikasiyasına mühüm töhfə verir.

Yeni regional əməkdaşlıq imkanları bütün dövlətlər üçün cəlbedici görünür.

Ermənistanla sülhün əldə olunması bu kontekstdə regionda yeni nəqliyyat və iqtisadi əməkdaşlıq imkanları yaradır. Prezident İlham Əliyevin qeyd etdiyi kimi, yeni tranzit marşrutlarının açılması Azərbaycanın əsas hissəsi ilə Naxçıvan Muxtar Respublikası arasında birbaşa əlaqənin təmin olunmasına imkan verəcək.

Bu isə təkcə Azərbaycan üçün deyil, bütövlükdə region üçün iqtisadi və geosiyasi baxımdan yeni perspektivlər açır.

Prezident İlham Əliyevin XIII Qlobal Bakı Forumunda səsləndirdiyi fikirlər Azərbaycanın regional və qlobal siyasətdə artan rolunu bir daha nümayiş etdirir.

Azərbaycanın son illərdə əldə etdiyi təcrübə – suverenliyin bərpası, münaqişədən sonra sülhün qurulması, enerji təhlükəsizliyinə töhfə və beynəlxalq nəqliyyat layihələrində fəal iştirak – müasir beynəlxalq münasibətlər sistemində mühüm model kimi qiymətləndirilə bilər.

Bu kontekstdə Azərbaycan yalnız regional güc kimi deyil, həm də qlobal dialoq və əməkdaşlıq platformalarının təşəbbüskarı kimi çıxış edir”.