Ermənistanda türk dilində danışdığım üçün döyüldüm... - FOTO

Bakupost.az Teleqraf-a istinadən xəbər verir ki, Qubadlı Rayon Məhkəməsinin qərarına əsasən, Badravi 1 il 1 ay müddətinə azadlıqdan məhrum edilib.

Məhkəmədə təqsirini etiraf edən Badravi Ermənistandan Azərbaycana nəyə görə keçmək istədiyini də ifadəsində bildirib:

“Milliyyətcə türkmənəm. 2022-ci ildə Ermənistana getdim. Ermənistanda müxtəlif işlərdə işlədim, fəhləlik, çobanlıq etdim. Amma maaşımı vermədilər. Anamla telefonla danışanda türk dilindən istifadə etdiyim üçün müdir məni döydü. Bu səbəbdən Ermənistandan çıxmaq qərarına gəldim. Araşdırma etdikdən sonra Ermənistanın Azərbaycanla sərhədinin olduğunu öyrəndim. Avtobusla sərhədə yaxın kəndə getdim, daha sonra “Quql məp” tətbiqindən istifadə edərək iki ölkənin sərhədinə yaxınlaşdım. Üç gün meşədə qaldım. Sentyabrın 1-də bir qədər piyada hərəkət etdikdən sonra qarşıma Azərbaycan bayrağı çıxdı. Nəticədə sərhədçilər tərəfindən saxlanıldım”.

Qeyd edək ki, ötən il sentyabr ayının 1-də Dövlət Sərhəd Xidmətinin Sərhəd Qoşunlarının "Qubadlı" əlahiddə sərhəd diviziyasının xidməti ərazisində Ermənistandan Azərbaycan istiqamətinə dövlət sərhədinin pozulması əlamətləri aşkar edilib. Çətin relyefə malik olan, dağlıq və sıx meşəlik ərazidə həyata keçirilmiş əməliyyat-qoşun tədbirləri nəticəsində dövlət sərhədini pozmuş İraq Respublikası vətəndaşı – 2002-ci il təvəllüdlü Əli İmad ət-Tallah Badravi saxlanılıb.