Fransa İran PUA-larını vurdu - Paris rəsmi olaraq müharibəyə qoşuldu

Fransanın silahlı qüvvələri İran pilotsuz uçan aparatlarına (PUA) əleyhinə əməliyyat həyata keçirib.

Bakupost.az “Le-Monde”yə istinadən xəbər verir ki, bu barədə məlumatı Fransa Prezidenti Emmanuel Makron verib. Onun sözlərinə görə, əməliyyat regionda gərginliyin artdığı bir dövrdə, müttəfiq ölkələrin hava məkanının qorunması məqsədilə həyata keçirilib.

Rəsmi açıqlamada deyilir ki, İran PUA-ları dost ölkələrin səmasında əməliyyat apararaq müttəfiqlərin hava məkanını təhdid edirdi. Parisin dərhal reaksiyası nəticəsində bir sıra PUA-lar məhv edilib və regiondakı hərbi və mülki obyektlərin təhlükəsizliyi təmin olunub. Fransa Prezidenti televiziya müraciətində bu əməliyyatın “özünümüdafiə” məqsədli olduğunu açıqlayıb.

Fransa Xarici İşlər Nazirliyi və Müdafiə Nazirliyi bildiriblər ki, bu addım Avropa və müttəfiq ölkələrin maraqlarını qorumaq üçün zəruri idi. Əlavə olaraq, Paris Kiprdə hava müdafiə və anti-PUA sistemlərini yerləşdirib, Yaxın Şərqdə “Rafale” döyüş təyyarələrini aktivləşdirib və hərbi gəmisini regiona göndərib.

Bu əməliyyat regionda strateji balansı dəyişdirə bilər və yaxın günlərdə diplomatik səviyyədə gərginliklərin artması ehtimal olunur.

Cavid, BakuPost