Gənclər özlərini yandırır – Sosial şəbəkələrdə qorxunc trend - Deodorant Challenge - VİDEO

Bakupost.az -ın məlumatına görə, bəzi yeniyetmələr qol nahiyələrində aerozol tipli dezodorantlardan istifadə etməklə qəsdən qəribə izlər yaradırlar. Sosial şəbəkələrdə yayılan bu davranış beynəlxalq mediada “Deodorant Challenge” (dezodorant çağırışı) adı ilə tanınır.

Belə ki, yeniyetmələr dezodorantı dəriyə çox yaxın məsafədən uzun müddət sıxaraq saxlayır, nəticədə qol nahiyəsində yumru formalı, yanıqlara bənzər izlər əmələ gəlir. Mütəxəssislərin bildirdiyinə görə, bu zaman dezodorantın tərkibindəki sıxılmış qaz ani şəkildə çox aşağı temperatur yaradır və dəridə soyuq yanıq (aerosol frostbite) adlanan ciddi zədələnməyə səbəb olur.

Həkimlər xəbərdarlıq edirlər ki, bu cür “təcrübələr” dərinin dərin qatlarını zədələyə, infeksiyalara, su toplamasına və sonradan qalıcı çapıqlara yol aça bilər. Bəzi hallarda isə tibbi müdaxilə qaçılmaz olur.

Qeyd edək ki, bu qorxunc trend təkcə Azərbaycanda deyil, eyni zamanda ABŞ, Böyük Britaniya və bir sıra Avropa ölkələrində də gənclər arasında yayılıb. Xarici mənbələrdə bu davranış illər əvvəl də müşahidə olunub və mütəxəssislər onun sosial şəbəkələrdə yayılan “çağırış mədəniyyəti”nin təhlükəli nəticələrindən biri olduğunu bildirirlər.

Valideynlərə və müəllimlərə övladlarının sosial şəbəkə davranışlarına diqqət yetirmələri, yeniyetmələrlə bu cür riskli “trend”lərin fəsadları barədə söhbətlər aparmaları tövsiyə olunur.

Mövzunu davam etdirəcəyik.