Özəl məktəblərdə tədrisin başlaması qərarını kim verməlidir? - Şərhlər

“Bəzi məktəblərdə dərslərin Cambridge, IB - International Baccalaureate proqramları və ya başqa məzmunla tədrisini təşkil edirlər. Bu məktəblərdə tədris müddəti daha uzun olur. Məsələn, 36-38, hətta bəzi proqramlarda daha da çox ola bilər. Bu mənada özəl məktəblər əyani tədrisi öz təqvim planlarına uyğun bərpa edə bilərlər. Onların belə bir hüquqları var”.

Bakı Britaniya Məktəbində (Bakı British School) ənənəvi tədris sentyabrın 9-dan bərpa olunub.

KASPİ Liseyi, XXI Əsr Beynəlxalq Təhsil və İnnovasiya Mərkəzində dərslər sentyabrın 15-dən başlayıb.

Avropa Azərbaycan Məktəbi və Bakı Fransız Liseyində isə dərslər sentyabrın 1-də başlasa da, sonradan dayandırılıb:

“Dərslər bu ayın 1-də başladı. Lakin 3-də dayandırıldı. Nazirin brifinqdəki özəl məktəblərlə bağlı qərarından sonra yenidən fəaliyyətimizi davam etdirdik”.

Mövzu ilə bağlı Bakupost.az -a danışan "Məktəb guşəsi" jurnalının və saytının baş redaktoru, təhsil məsələləri üzrə ekspert Məzahir Məmmədli qeyd etdi ki, özəl məktəblərin Təhsil Nazirliyinə yalnız proqram və tədrisin təşkili ilə bağlı tabeliliyi var:

“Digər məsələlərdə müstəqildirlər, özləri qərar verə bilərlər. Pandemiya dövründə Nazirlər Kabineti tərəfindən verilmiş qərara görə, artıq ümumtəhsil məktəbləri, o cümlədən özəl məktəblərin hamısı pandemiya qaydalarına uyğun idarə olunur. Özəl məktəblər özlərinin daxili pedaqoji şurasının qərarı ilə istədiyi məsələdə müstəqildirlər. Hər bir məsələyə özləri qərar verib, onun icrası ilə məşğul ola bilirlər. Sadəcə olaraq, pandemiya dövründə Nazirlər Kabinetinin qaydalarına uyğun qərarlarını uyğunlaşdırırlar”.

“Təhsil nazirinin bu qərarı verməsinin səbəbi özəl məktəblərdə müxtəlif beynəlxalq kurrikulumlarla tədrisin aparılmasıdır. Məsələn, Cambridge, America, IB kurrikulumları buna misaldır. Kurrikulumlar bir-birindən cüzi fərqlənir. Bəzilərinin həftəsi, dərs yükü daha çox olduğundan nazir bu mənada özəl məktəbləri sərbəst buraxdı. Məsələn, Azərbaycan Britaniya Kolleci ayın 1-dən tədrisə başladı. Daha sonra nazirlikdən bildirildi ki, bu barədə qərar verilməyib və dərslər dayandırıldı. 2-3 gün sonra brifinq oldu, orada nazir özəl məktəblərdə tədrisin bərpa oluna biləcəyini dedi.

Düşünürəm ki, özəl məktəblərdə müəyyən avtonomiya olduğu üçün bu mənada sərbəst qərarvermə hüququna sahibdirlər. Dünyada məktəblərin daxili sərbəstliyi artmaqdadır. Azərbaycanda da bu avtonomiyaya, idarəetmədə muxtariyyətə ehtiyac var. Əgər hər şey mərkəzdən idarə olunacaqsa, o zaman məktəb direktorlarının vəzifəsi, səlahiyyəti nədir? Bu halda vəzifələri sadəcə mövcud vəziyyəti idarə edən, menecerlikdən ibarət olur. Biz isə onlardan liderlik gözləyirik. Özəl məktəblərlə bağlı verilən qərarın normal olduğunu düşünürəm”.