Qulu Məhərrəmli Mirşahini və telekanal rəhbərlərini debata çağırdı - VİDEO

Aparıcı son zamanlar Azərbaycan teleməkanında inkişaf meyillərinin olduğunu, AzTV-nin, İTV-nin, ARB-24-ün timsalında müsbət dəyişikliklərin müşahidə olunduğunu, lakin qalan bir neçə kanalın ictimai zövqü korladıqlarını vurğulayıb: "Məndə olan dəqiq məlumatlara görə, bu kanalların rəhbərləri Prezident Administrasiyasına çağırılıb, onlara ən kəskin şəkildə iradlar bildirilib. Hətta bəzi verilişlərin oyunbazlıq məkanına, pul yığımı məntəqəsinə çevrilməsi, sonra da yığılan vəsaitin dəllallar arasında bölünməsi, bununla da bütün ölkə ictimaiyyətini aldatmaq, təhqir etmək kimi halların olduğu sərt şəkildə kanal rəhbərlərinə çatdırılıb. Məndə məsələnin hüquq-mühafizə müstəvisində araşdırma perspektivinin olması barəsində də məlumatlar var".

ATV prezidenti Azər Xəlilov sosial şəbəkədə Mirşahinə cavab verdi. Ardınca məsələ ilə bağlı ATV və ARB rəhbərliyi birgə bəyanat yaydı, Mirşahinin "bəzi verilişlərin oyunbazlıq məkanına, pul yığımı məntəqəsinə çevrilməsi, sonra da yığılan vəsaitin dəllallar arasında bölünməsi" barəsində ittihamının cəfəngiyat olduğunu bildirdilər və onu məhkəmə ilə hədələdilər.

Onun fikrincə, tərəflər üz-üzə oturub müəyyən debatda məsələni həll edə bilərlər:

“Problemlər ola bilər, oturub sakit, rahat həll etmək mümkündür. Bunun müsbət tərəfi ondan ibarətdir ki, televiziyalarda hansı narahat məqamlar varsa, mübahisələrdə aşkar görünür. Burada tərəf tutmaq çox çətindir. Çünki hər iki tərəf müəyyən arqumentlərlə danışır. Arzulayardım ki, bu konflikt tezliklə sona yetsin. Televiziyalar özlərinin əsas işi ilə, yəni, maraqlı, keyfiyyətli verilişlər hazırlamaqla məşğul olsunlar.

Tamaşaçıların tələbatına cavab verən yüksək səviyyəli, reytinqli verilişlərlə ekranda görüşə bilək.

Tərəflərdən kimin haqlı, kimin haqsız olduğunu söyləmək çətindir. Amma vəziyyətdən çıxış yolu müəyyən bir debatda üz-üzə oturub, problemi çözmək və tamaşaçıları da bununla bağlı məlumatlandırmaqdır. Bütün hallarda hesab edirəm ki, televiziyaların ictimai rəyə təsiri var. Eyni zamanda insanların televiziyalardan gözləntiləri daha çoxdur. Televiziya kanalları diqqətlərini daha çox həmin gözləntilərin reallaşdırılmasına yönəltməlidir”.